Saturday, March 12, 2016

အပြည်ပြည်ဆိုင်ရာအမျိုးသမီးများနေ့ အထိမ်းအမှတ် အခမ်းအနားကျင်းပ

မကွေး         မတ်       ၉

အမျိုးသမီးထုတစ်ရပ်လုံး၏ လူ့အခွင့်အရေးလှုပ်ရှားမှု သမိုင်းမှတ်တိုင်တစ်ခုဖြစ်သည့် အပြည်ပြည်ဆိုင်ရာ အမျိုးသမီးများနေ့ အထိမ်းအမှတ် အခမ်းအနားအား မကွေးမြို့၊နန်းထိုက်သူဟိုတယ်၌ ယနေ့နံနက် ၉ နာရီမှ ညနေ၅နာရီ အချိန်ထိ ကျင်းပခဲ့ရာ နယ်ပယ်အဖွဲ့အစည်းအသီးသီးမှ အမျိုးသမီးများ ၊ ဖိတ်ကြားထားသူများ အင်အား( ၁၅၀ )ဦးခန့် တက်ရောက်ခဲ့ကြောင်း သိရသည်။

အခမ်းအနားတွင် ရောင်ခြည်သစ် ဒါရိုက်တာ ဒေါ်ခင်လှမှ ကြိုဆိုနှုတ်ခွန်းဆက်စကားပြောကြားခဲ့ပြီး မကွေးတိုင်းဒေသကြီးအစိုးရအဖွဲ့ဝင် လူမှုရေးဝန်ကြီး ဦးအောင်ကျော်မင်းက အဖွင့်အမှာစကားပြောကြားရာတွင် `` နိုင်ငံနဲ့လူမျိုး တိုးတက်ရေးကိစ္စတွေမှာ အမျိုးသမီးတွေဟာ တက်ကြွစွာပါဝင်ဆောင်ရွက်ခဲ့ပါကြောင်း ကမ္ဘာတစ်ဝှမ်းမှာ အမျိုးသမီးတွေ ကတော့ ခုချိန်ထိနည်းမျိုးစုံနဲ့ ခွဲခြားဆက်ဆံခံနေရတုန်းပဲဖြစ်ပါတယ်။ ဒီလိုဆက်ဆံခံနေရတာတွေကလည်း အမျိုးသားတွေနဲ့ တိုက်ရိုက်ဆက်စပ်နေတာကြောင့် အမျိုးသမီးအခွင့်အရေးတွေအတွက် အမျိုးသားတွေကလည်း ပူးပေါင်းပါဝင်ဖို့ လိုအပ် ပါတယ်´´ ဟု အကြံပြုပြောကြားခဲ့သည်။

အစီအစဉ်အရ အပြည်ပြည်ဆိုင်ရာအမျိုးသမီးများနေ့ သမိုင်းကြောင်းအား ဒေါ်ခင်သန်းနွယ်ဇင်မှ ရှင်းလင်းပြော ကြားခြင်း ၊ မကွေးတိုင်းဒေသကြီးလူမှုဝန်ထမ်းဦးစီးဌာနမှူး ဒေါ်ခင်နွဲ့မှ အပြည်ပြည်ဆိုင်ရာအမျိုးသမီးများနေ့ သ၀ဏ်လွှာအား ဖတ်ကြားခြင်းများ ဆောင်ရွက်ပြီး နယ်ပယ်အဖွဲ့အစည်းအသီးသီးမှ တက်ရောက်လာကြသူများ မှတ်တမ်းတင် ဓာတ်ပုံ ရိုက်ကူးခဲ့ကြသည်။

ထို့နောက် `ကျားမတန်းတူညီမျှရေး အလေးထားလို့ဆောင်ရွက်ပေး´ ခေါင်းစဉ်ဖြင့် စကားဝိုင်းဆွေးနွေးခြင်းအား စတင်ခဲ့ပြီး ရောင်ခြည်သစ် စီမံကိန်းမန်နေဂျာ ဒေါ်နော်မာမာချို ၊ လူမှုဝန်ထမ်း ဦးစီးဌာနမှ လက်ထောက်ညွှန်ကြားရေးမှူး ဒေါ်နွယ်နွယ်ဦး ၊ မဇ္ဈိမမီဒီယာမှ ဒါရိုက်တာဒေါ်သင်းသင်းအောင် ၊ Action Aid Myanmar မှ မကွေးဒေသဆိုင်ရာမန်နေဂျာ ဦးအောင်မင်းနိုင် ၊ မကွေးလူငယ်ကွန်ယက်မှ ညှိုနှိုင်းရေးမှူး ဦးအောင်လင်းကြည် တို့ ပါဝင်ဆွေးနွေးမှုများ ဆောင်ရွက် သည်။

ဆက်လက်၍ ဖျော်ဖြေရေး နှင့် ဥာဏ်စမ်းပဟေဋ္ဌိအစီအစဉ်များ ၊ အုပ်စုလိုက်ဆွေးနွေးခြင်းများ ၊ ရွေးကောက်ပွဲ ဆိုင်ရာပြန်လည်မျှဝေခြင်းများ ဆောင်ရွက်ခဲ့ပြီး တက်ရောက်လာသူများမှ She Leads သီချင်းအား သံပြိုင်သီဆိုကာ အခမ်းအနားကိုရုပ်သိမ်းခဲ့ကြောင်း သိရသည်။
သန်းနိုင်ဦး(ငဖဲ)

0 comments:

Post a Comment