မင်းဘူးမြို့တွင် Facility Quarantine Center အဖြစ်အသုံးပြုခဲ့သော စာသင်ကျောင်းများအား ပြန်လည်အပ်နှံရန် ပိုးသတ်ဆေးဖြန်းခြင်းနှင့် သန့်ရှင်းရေးလုပ်ငန်းများဆောင်ရွက်

မင်းဘူး          ဇွန်               ၆

          မကွေးတိုင်းဒေသကြီး၊ မင်းဘူးမြို့တွင် ပြည်ပနိုင်ငံများမှ  ပြန်လည်ဝင်ရောက်လာသူ များအား Facility Quarantine Center အဖြစ်အသုံးပြုခဲ့သော စာသင်ကျောင်းများအား သက်ဆိုင်ရာပညာရေးဌာနသို့ ပြန်လည်အပ်နှံရန် ပိုးသတ်ဆေးဖြန်းခြင်းနှင့် သန့်ရှင်းရေး လုပ်ငန်းများ ဆောင်ရွက်ခြင်းကို ယနေ့ နံနက် ၉ နာရီအချိန်က မင်းဘူးမြို့၊ အမှတ်(၁) အခြေခံပညာအထက်တန်းကျောင်း၌ ဆောင်ရွက်ခဲ့ကြောင်း သိရသည်။

“အခုလို သန့်ရှင်းရေးလုပ်ပြီး ဆေးဖျန်းတာက ကျောင်းတွေကိုကျောင်းပြန်ဖွင့်တဲ့ အချိန်မှာ ကျောင်းသားလေးတွေ ရောဂါကူးစက်မှုအန္တရာယ်ကင်းဝေးစေဖို့နဲ့ ကျောင်းသားမိဘတွေ ယုံကြည်စိတ်ချလို့ရအောင် စာသင်ကျောင်းတွေကို ဆေးဖျန်း ခြင်း ဆောင်ရွက်နေတာ ဖြစ်ပါတယ်၊ ကျောင်းကိုလာရောက်မယ့် ကျောင်းသား/ကျောင်းသူ တွေနဲ့ ကျောင်းသားမိဘတွေ လုံခြုံစိတ်ချစွာ ဝင်ထွက်သွားလာလို့ရအောင် ကျန်းမာရေးနှင့် အားကစားဝန်ကြီးဌာန လမ်းညွှန်ချက်များနဲ့အညီ စာသင်းကျောင်းများကို ယခုလို ဆောင်ရွက် ခြင်းဖြစ်ပါတယ်၊ ကျောင်းပြန်ဖွင့်တဲ့ အခါမှာလည်း ဆရာ/ဆရာမတွေနဲ့ ကျောင်းသားများ အားလုံးကလည်း နှာခေါင်းစည်း တပ်ဆင်ရမှာပါ၊  ကျောင်းတွေမှာလည်း လက်ဆေးမယ့် ဘေစင်တွေ ထားရှိသွားမှာဖြစ်ပါတယ်၊ ယခုလို ဆောင်ရွက်ထားတဲ့အတွက် မိဘပြည်သူများ အနေနဲ့ စိုးရိမ်စရာမဖြစ်ရအောင် သေခြာပြင်ဆင်ထားတာပါ” ဟု မြို့နယ်အုပ်ချုပ်ရေးမှူး ဦးသိန်းဇော်ကံ က ပြောကြားသည်။

         

အဆိုပါ ပိုးသတ်ဆေးဖြန်းခြင်းနှင့် သန့်ရှင်းရေးလုပ်ငန်းများဆောင်ရွက်ခြင်းကို ကျောင်းဝန်းအတွင်းရှိ စာသင်ခန်းများ၊ ရေးချိုးခန်းနှင့် အိမ်သာများအားလုံးကို အမှိုက်များ ရှင်းလင်းခြင်း၊ ရေဆေးသန့်စင်ခြင်း၊ ပိုးသတ်ဆေးဖျန်းခြင်းနှင့် စာသင်ခုံများပြန်လည်နေရာ ချထားပေးခြင်း  စသည့်လုပ်ငန်းများကို မြို့နယ်အထွေထွေအုပ်ချုပ်ရေးဦးစီးဌာန ဝန်ထမ်းများ၊ မီးသတ်တပ်ဖွဲ့ဝင်များ၊ စည်ပင်သာယာရေးအဖွဲ့ဝန်ထမ်းများ၊ ဌာနဆိုင်ရာဝန်ထမ်းများနှင့် ရပ်ကွက်လူမှုရေးအဖွဲ့ဝင်းများက ဝိုင်းဝန်း၍ ပူးပေါင်းပါဝင် ဆောင်ရွက်ခဲ့ကြောင်း သိရသည်။     

မောင်မောင်(မင်းဘူး)