ညောင်ဦးမြို့တွင် ထီဆိုင်များအား နေအိမ်၌ရောင်းချခြင်းနှင့် Mobile စနစ်ဖြင့် လှည့်လည် ရောင်းချခြင်းတို့ ခွင့်ပြု

ညောင်ဦး       ဧပြီ       ၂၅

မန္တလေးတိုင်းဒေသကြီး၊ ညောင်ဦးမြို့တွင် ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီ လုပ်ငန်းညှိနှိုင်းအစည်းအဝေး ဆုံးဖြတ်ချက်အရ ကိုဗစ်-၁၉ ရောဂါ ကူးစက်ပြန့်ပွားမှုမရှိစေ ရေးနှင့် လူစုလူဝေး မဖြစ်ပေါ်စေရေးတို့အတွက် မြို့နယ်အတွင်းရှိ ထီဆိုင်များအား ၎င်းတို့၏ နေအိမ် တွင်သော်လည်းကောင်း၊ Mobile စနစ်ဖြင့် လှည့်လည်၍သော်လည်းကောင်း ရောင်းချခွင့် ပြုကြောင်း သိရသည်။

ညောင်ဦးမြို့ရှိ ထီဆိုင်ပိုင်ရှင်များသည် ယခင်က မဏိစည်သူဈေးတိုက်ခန်းနှင့် ဘုန်းစဉ်ဈေး တိုက်ခန်းများတွင် ထီဆိုင်များဖွင့်လှစ်ရောင်းချလျက်ရှိပါသည်။ ယခုအခါ ကိုဗစ်-၁၉ ကူးစက်မြန်ရောဂါ ကြောင့် ဈေးများခေတ္တပိတ်ထားသဖြင့် ရောင်းချခွင့်မရရှိဘဲ ထီဆိုင်ပိုင်ရှင်တစ်ဦးလျှင် သိန်း (၂၀၀) မှ သိန်း(၄၀၀) အထိ ဆုံးရှုံးနစ်နာမှု ဖြစ်ပေါ်မည်ဖြစ်ပြီး အနီးပတ်ဝန်းကျင်မြို့များဖြစ်သော ပခုက္ကူ၊ ချောက်၊ ကျောက်ပန်းတောင်းနှင့် မိတ္ထလာမြို့များတွင် ဖွင့်လှစ်ရောင်းချခွင့် ပေးထားသဖြင့် ညောင်ဦးမြို့တွင် လည်း ရောင်းချခွင့်ပြုပေးစေလိုကြောင်း ထီဆိုင်ပိုင်ရှင်အများစုမှ တင်ပြလာသဖြင့် ပြည်သူများနစ်နာမှု မရှိစေရေး မြို့နယ်အဆင့် ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီ လုပ်ငန်းညှိနှိုင်း အစည်းအဝေး ဆုံးဖြတ်ချက်အရ နေအိမ်တွင်လည်းကောင်း၊ Mobile စနစ်ဖြင့် လှည့်လည်ရောင်းချ၍ သော်လည်းကောင်း ခွင့်ပြုပေးခဲ့ခြင်းဖြစ်ကြောင်း မြို့နယ်အုပ်ချုပ်ရေးမှူး ဦးမြင့်ထွန်းထံမှ သိရသည်။

   ကျော်မင်းဦး(ရေနံချောင်း)