ပွင့်ဖြူမြို့နယ်၌ ဧရာဝတီမြစ်ကမ်းပါးပြိုကျမှုကြောင့် ဘေးလွတ်ရာသို့ပြောင်းရွှေ့ရသည့် လူနေအိမ်များအတွက် ထောက်ပံ့ငွေပေးအပ်

ပွင့်ဖြူ      ဇန်နဝါရီ      ၁၀

            မကွေးတိုင်းဒေသကြီး ၊ ပွင့်ဖြူမြို့နယ်တွင် ဧရာဝတီမြစ်ကမ်းပါးပြိုကျမှုကြောင့် ဘေးလွတ်ရာသို့ ပြောင်းရွှေ့ရသည့် လူနေအိမ်များအတွက် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှ ထောက်ပံ့ငွေပေးအပ်ခြင်း အခမ်းအနားကို ဇန်နဝါရီ ၁၀ ရက် ၊ ယနေ့ နံနက် ၁၁ နာရီက ပွင့်ဖြူမြို့နယ်အထွေထွေအုပ်ချုပ်ရေးဦးစီးဌာနရုံး ဗိုလ်ဉတ္တမခန်းမ၌ ကျင်းပခဲ့သည်။

            ထောက်ပံ့ငွေများပေးအပ်ရာတွင် ရှေးဦးစွာ ပွင့်ဖြူမြို့နယ် ပြည်သူ့လွှတ်တော်ကိုယ်စားလှယ် ဦးထွန်းထွန်း က  မြို့နယ်အတွင်း ဧရာဝတီမြစ်ကမ်းဘေးကျေးရွာများမှ ဒေသခံပြည်သူများအနေဖြင့် ကမ်းပါးပြိုကျမှုအန္တရာယ် ကင်းဝေးစေရန် ကြိုတင်ကာကွယ်ရေးလုပ်ငန်း ဆောင်ရွက်သွားကြစေလိုကြောင်း၊ သဘာဝဘေးအန္တရာယ်များနှင့် ပတ်သက်ပြီး ကြုံတွေ့ ရသည့်အခြေအနေအား သက်ဆိုင်ရာတာဝန်ရှိသူများထံ အချိန်နှင့် တစ်ပြေးညီ သတင်းပေးပို့ကြစေလိုကြောင်းနှင့် ထောက်ပံ့ငွေများကိုလည်း အကျိုးရှိရှိ စနစ်တကျ သုံးစွဲသွားကြစေလိုကြောင်း ဆွေးနွေးပြောကြားသည်။

            ဆက်လက်၍ မင်းဘူးခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ဦးစီးအရာရှိ ဒေါ်တင်တင်ထွေး က ထောက်ပံ့ငွေ ပေးအပ်ရခြင်းနှင့် သဘာဝဘေးအန္တရာယ်နှင့် စပ်လျဉ်းပြီး ပြည်သူများ အန္တရာယ်ကင်းဝေးစေရန် ကြိုတင်ကာကွယ်ရမည့် နည်းလမ်းများကို ဆွေးနွေးပြောကြားသည်။        

            ၎င်းနောက် ပြည်သူ့လွှတ်တော်ကိုယ်စားလှယ် ဦးထွန်းထွန်း ၊ မင်းဘူးခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ဦးစီးအရာရှိ ဒေါ်တင်တင်ထွေးနှင့် တာဝန်ရှိသူများက ဧရာဝတီမြစ်ကမ်းပါးပြိုကျမှုကြောင့် ဘေးလွတ်ရာသို့ ပြောင်းရွှေ့ခဲ့ရ သည့် ပွင့်ဖြူမြို့နယ် အရှေ့လေးအိမ်ကျေးရွာအုပ်စု ၊ မြင်းခြံစုကျေးရွာရှိ လူနေအိမ် ၁၂ လုံး နှင့် နန်းတော်ကျွန်းကျေးရွာအုပ်စု ၊ ထူးကျေးရွာရှိ လူနေအိမ် ၈ လုံး အတွက် လူနေအိမ် တစ်လုံးလျှင် ထောက်ပံ့ငွေကျပ် တစ်သိန်းနှုန်းနှင့် ဘေးသင့်အိမ်ထောင်စုဝင် ၈၉ ဦးအတွက်  စားနပ်ရိက္ခာဆန်ဖိုးငွေကျပ် ၁၈၆၉၀၀ ၊ စုစုပေါင်း ထောက်ပံ့ငွေကျပ် ၂၁၈၆၉၀၀ အား ကမ်းပါးပြို ဘေးသင့်သည့် အိမ်ထောင်စုဝင်များထံ ထောက်ပံ့ပေးအပ်ခဲ့ကြောင်း သိရသည်။  ရဲဝင်းနိုင် ( ညောင်ဦး )