Thursday, October 17, 2019

ကျေးလက်ဖွံ့ဖြိုးရေးလုပ်ငန်းများ ဆောင်ရွက်နိုင်ရေး တင်ဒါဆိုင်ရာအချက်အလက်များ ရှင်းလင်းပွဲကျင်းပ


မကွေး  အောက်တိုဘာ  ၁၆
မကွေးတိုင်းဒေသကြီး ကျေးလက်ဒေသဖွံ့ဖြိုးတိုးတက်ရေးဉီးစီးဌာနက ၂၀၁၉-၂၀၂၀ ခု ဘဏ္ဍာရေးနှစ်တွင် ငွေလုံး ငွေရင်းအသုံးစရိတ်ဖြင့် ဆောင်ရွက်မည့် ကျေးလက်ဖွံ့ဖြိုးရေးလုပ်ငန်းများအတွက် တင်ဒါဆိုင်ရာအချက်အလက်များ ရှင်းလင်းဆွေးနွေးပွဲကို ယနေ့နံနက် ၉ နာရီအချိန်က အဆိုပါ ဦးစီးဌာန အစည်းအဝေးခန်းမတွင် ကျင်းပခဲ့ကြောင်း သိရသည်။

ရှေးဦးစွာ မကွေးတိုင်းဒေသကြီးအစိုးရအဖွဲ့ စိုက်ပျိုးမွေးမြူရေးနှင့်ဆည်မြောင်းဝန်ကြီးဌာန ဝန်ကြီး ဦးဝင်းမော်ဌေး က မိမိတို့တိုင်းဒေသကြီးအတွင်း ဖွံ့ဖြိုးရေးလုပ်ငန်းများကို တင်ဒါဆွဲဝယ် ဆောင်ရွက်မည့် ကုမ္ပဏီများအား ကြိုဆို ပါကြောင်း၊ တင်ဒါဆွဲဝယ်သည့် ကုမ္ပဏီများအနေဖြင့် တင်ဒါရရှိပါက လုပ်ငန်းများကို အရည်အသွေးပြည့်မီစွာ ဆောင်ရွက်စေလိုကြောင်း၊ မိမိတို့ ဌာနအနေဖြင့်လည်း နိုင်ငံတော်သမ္မတရုံးမှ ထုတ်ပြန်ထားသည် ညွှန်ကြားချက်အမှတ် (၁ /၂၀၁၇) နှင့်အညီ ဆောင်ရွက်လျက်ရှိပါကြောင်း အဖွင့်အမှာစကားတွင် ထည့်သွင်း ပြောကြားပါသည်။
ဆက်လက်၍ မကွေးတိုင်းဒေသကြီး ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန တိုင်းဒေသကြီးဦးစီးမှူး ဦးမျိုးအောင်က ၂၀၁၉-၂၀၂၀ ခု ဘဏ္ဍာရေးနှစ်အတွင်း ငွေလုံးငွေရင်းအသုံးစရိတ်ဖြင့် ဆောင်ရွက်မည့် ကျေးလက် ဖွံ့ဖြိုးရေးလုပ်ငန်းများအတွက် တင်ဒါတင်သွင်းသူများ လိုက်နာရမည့် စည်းကမ်းချက်များကို ရှင်းလင်းပြောကြား ပါသည်။
ထို့နောက်တက်ရောက်လာကြသော လုပ်ငန်းရှင်ကုမ္ပဏီများမှ တင်ဒါလျှောက်လွှာတင်သွင်းခြင်းနှင့် ပတ်သက်၍ သိရှိလိုသည်များကို မေးမြန်းကြရာ သက်ဆိုင်ရာ တာဝန်ရှိသူများက ပြန်လည်ရှင်းလင်းပြောကြားပါသည်။
အဆိုပါ ၂၀၁၉-၂၀၂၀ ခု ဘဏ္ဍာရေးနှစ်တွင် ငွေလုံး ငွေရင်းအသုံးစရိတ်ဖြင့် ဆောင်ရွက်မည့် ကျေးလက်ဖွံ့ဖြိုးရေး လုပ်ငန်းများအတွက် တင်ဒါဆိုင်ရာအချက်အလက်များ ရှင်းလင်းဆွေးနွေးပွဲသို့ စိုက်ပျိုးမွေးမြူရေးနှင့် ဆည်မြောင်း ဝန်ကြီး၊ တင်ဒါကော်မတီဝင်များ၊ တိုင်းဒေသကြီး၊ ခရိုင်၊ မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန တာဝန်ရှိသူများ၊ လုပ်ငန်းရှင်ကုမ္ပဏီများ စုစုပေါင်း (၁၀၀)ဦးခန့် တက်ရောက်ခဲ့ကြောင်းသိရသည်။
သန်းလွင်(မကွေး)

0 comments:

Post a Comment