Thursday, February 1, 2018

ပွင့်ဖြူမြို့နယ် သရက်တောကျေးရွာ ပညာရောင်ခြည်စာကြည့်တိုက်ရှေ့တွင် ထားရှိမည့် ဗိုလ်ချုပ်ကြေးရုပ်တုအား မြို့မိမြို့ဖများနှင့် ကျောင်းသားကျောင်းသူများမှ သောင်းသောင်းဖြဖြ ကြိုဆို




ပွင့်ဖြူ  ဖေဖော်ဝါရီ 
          မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ် သရက်တောကျေးရွာ ပညာရောင်ခြည်စာကြည့်တိုက်ရှေ့တွင် ဗိုလ်ချုပ်ကြေးရုပ်တု စိုက်ထူထားရှိရန်အတွက် မန္တလေးမြို့မှ သယ်ဆောင်လာခဲ့သော ဗိုလ်ချုပ်ကြေးရုပ်တု မော်တော်ယာဉ်အဖွဲ့သည် ဖေဖော်ဝါရီ ၁ ရက်၊ ယနေ့မွန်းလွဲ ၃ နာရီက ပွင့်ဖြူမြို့သို့ ရောက်ရှိခဲ့ရာ ဒေသခံမြို့မမြို့ဖများ၊ ပွင့်ဖြူ(အ.ထ.က)ကျောင်းမှ ဆရာ၊ ဆရာမများနှင့် ကျောင်းသားကျောင်းသူများအဖွဲ့မှ ဘင်ခရာသံစုံတီးဝိုင်းများဖြင့် သောင်းသောင်းဖြဖြ ကြိုဆိုခဲ့ကြကြောင်း သိရသည်။
          ပွင့်ဖြူမြို့နယ် သရက်တောကျေးရွာ ပညာရောင်ခြည်စာကြည့်တိုက်တွင်ထားရှိမည့် ဗိုလ်ချုပ်ကြေးရုပ်တုအား ကျေးရွာရှိ ဗိုလ်ချုပ်ကြေးရုပ်တုဖြစ်မြောက်ရေးကော်မတီဥက္ကဌ ဦးကိုလေး ဦးဆောင်၍ ကော်မတီဝင်များအဖွဲ့မှ အလှူငွေများ ကောက်ခံ၍ မန္တလေးမြို့တွင် မှာယူသွင်းထုခဲ့ခြင်းဖြစ်ပြီး အဆိုပါ ဗိုလ်ချုပ်ကြေးရုပ်တုမှာ ကြေးပိဿာချိန် (၁၇၀)ခန့် ရှိပြီး ကုန်ကျငွေကျပ် သိန်း(၁၂၀)ခန့် ရှိကြောင်း သိရသည်။ ကျွန်တော်တို့ ပွင့်ဖြူမြို့နယ် သရက်တောကျေးရွာ ပညာရောင်ခြည်စာကြည့်တိုက်ရှေ့မှာ ဗိုလ်ချုပ်ကြေးရုပ်တု စိုက်ထူထားရှိနိုင်ဖို့အတွက် ကျေးရွာမှာရှိတဲ့ ရပ်မိရပ်ဖများနှင့် တိုင်ပင်ပြီး ဗိုလ်ချုပ်ကြေးရုပ်တုဖြစ်မြောက်ရေး ကော်မတီကို ဖွဲ့စည်းပြီးတော့ အလှူငွေတွေ ကောက်ခံခဲ့ပါတယ်။ စေတနာရှင်ပြည်သူများထံမှ ကောက်ခံရရှိတဲ့ငွေနဲ့ ယခုလို ဗိုလ်ချုပ် ကြေးရုပ်တုကို အောင်မြင်အောင် ဆောင်ရွက်နိုင်ခဲ့တာဖြစ်ပါတယ်။ ဒီ ဗိုလ်ချုပ်ကြေးရုပ်တုကိုတော့ မန္တလေးမြို့မှာပဲ မှာယူခဲ့တာ ဖြစ်ပါတယ်။ မနေ့က မန္တလေးမြို့ကနေ မော်တော်ယာဉ်နဲ့ သယ်ဆောင်လာခဲ့တာ ဒီနေ့မွန်းလွဲပိုင်းမှာပဲ ကျွန်တော်တို့ ပွင့်ဖြူမြို့နယ်ကို ရောက်ရှိခဲ့တာဖြစ်ပါတယ်။ ဒါ့အပြင် ယခု သယ်ဆောင်လာတဲ့ ဗိုလ်ချုပ်ကြေးရုပ်တုကိုလည်း ဗိုလ်ချုပ်မွေးနေ့ဖြစ်တဲ့ ဖေဖော်ဝါရီ ၁၃ ရက်နေ့မှာ ကျွန်တော်တို့ကျေးရွာ ပညာရောင်ခြည်စာကြည့်တိုက်ရှေ့မှာ တစ်ခမ်းတနား ကျင်းပပြုလုပ်သွားမှာဖြစ်ပါတယ်။ ဗိုလ်ချုပ်ကြေးရုပ်တု စိုက်ထူထားရှိရတဲ့ရည်ရွယ်ချက်ကတော့ ကျေးရွာမှာရှိတဲ့ မျိုးဆက်သစ် လူငယ်မောင်မယ်တွေနဲ့ ကျောင်းသား ကျောင်းသူတွေကို ကျွန်တော်တို့နိုင်ငံရဲ့လွတ်လပ်ရေး ဖခင်ကြီးဖြစ်တဲ့ ဗိုလ်ချုပ်အောင်ဆန်းလိုမျိုး အရည်အချင်းပြည့်ဝတဲ့ လူရည်မွန်ကောင်းများ ပေါ်ထွန်းလာစေရန် ရည်ရွယ်ပြီး စိုက်ထူထားရှိရခြင်းဖြစ်ပါတယ် ဟု ဗိုလ်ချုပ်ကြေးရုပ်ဖြစ်မြောက်ရေး ကော်မတီဝင်တစ်ဦးဖြစ်သူ ဦးနိုင်လင်းထံမှ သိရသည်။   ရဲဝင်းနိုင် (ညောင်ဦး)

0 comments:

Post a Comment