Saturday, February 17, 2018

ပခုက္ကူမြို့၌ သိုး/ဆိတ်ထုတ်လုပ်တင်ပို့မှုမြှင့်တင်ရေးအလုပ်ရုံဆွေးနွေးပွဲကျင်းပ

ပခုက္ကူ ဖေဖော်ဝါရီ ၁၇
မကွေးတိုင်းဒေသကြီး၊ ပခုက္ကူမြို့၊ ပြည်သာယာခန်းမ၌ သိုး/ဆိတ်ထုတ်လုပ်တင်ပို့မှုမြှင့်တင်ရေးအလုပ်ရုံ ဆွေးနွေးပွဲကို  ဖေဖော်ဝါရီလ ၁၇ ရက် နံနက်၉နာရီအချိန်က ကျင်းပသည်။
ရှေးဦးစွာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးသန်းမြင့်နှင့်မကွေးတိုင်း  ဒေသကြီးအစိုးရအဖွဲ့ ဝန်ကြီးချုပ် ဒေါက်တာအောင်မိုးညိုတို့က အမှာစကားပြောကြားကြသည်။  ထို့နောက် မြန်မာ ကုန်သွယ်မှုမြှင့်တင်ရေးအဖွဲ့  ညွှန်ကြားရေးမှူးချုပ် ဦးအောင်စိုးက အမျိုးသားပို့ကုန်မဟာပျူဟာနှင့်သိုးဆိတ်တင်ပို့မှု မြှင့်တင်ရေး လုပ်ငန်းစီမံချက်ရေးဆွဲရေးအကြောင်းကိုလည်းကောင်း၊  UMFCCI အထွေထွေအတွင်းရေးမှူးချုပ်  ဦးအောင်ကြည်စိုးက သိုးဆိတ်ထုတ်လုပ်မှုမြှင့်တင်ရေး လုပ်ငန်းစီမံချက်အကြောင်းကိုလည်းကောင်း၊ စားသုံးသူ ရေးရာဦးစီးဌာန၊ ဒုတိယညွှန်ကြားရေးမှူးချုပ် ဦးအောင်မောင်းက ဆိတ်အစုအဖွဲ့များမှ ဆိတ်မွေးမြူရေးဇုန်များ အကောင်အထည်ဖော်ဆောင်ရွက်နေမှုအခြေအနေများကိုလည်းကောင်းအသီးသီးရှင်းလင်းပြောကြားသည်။  ဆက်လက်၍ (က) ထုတ်လုပ်မှုမြှင့်တင်ရေး၊ (ခ)  ပို့ကုန်တိုးမြှင့်ရန် ပတ်ဝန်းကျင်ကောင်းများရရှိရေး၊ (ဂ) ဈေးကွက် ရရှိရေး၊ (ဃ) တန်ဖိုးမြှင့်ထုတ်ကုန်များ ထုတ်လုပ်နိုင်ရေး စသည့်သိုးဆိတ်မွေးမြူတင်ပို့မှုမြှင့်တင်ရေး စားပွဲဝိုင်းအား အုပ်စုဖွဲ့၍  ဆွေးနွေးအဖြေရှာကြပြီး မြန်မာ ကုန်သွယ်မှုမြှင့်တင်ရေးအဖွဲ့၊ညွှန်ကြားရေးမှူးချုပ် ဦးအောင်စိုးကနိဂုံးချုပ် အမှာစကားပြောကြားသည်။
ထိုအလုပ်ရုံဆွေးနွေးပွဲကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက  ဦးဆောင်၍ သိုး/ဆိတ်  ထုတ်လုပ်တင်ပို့မှုမြှင့်တင်ရေးအတွက် စစ်ကိုင်းတိုင်းအောက်ပိုင်း၊ မကွေးတိုင်းဒေသကြီးနှင့်မန္တလေးတိုင်းဒေသကြီး တို့ကို အခြေခံ၍ သိုးဆိတ်  မွေးမြူရေးဇုန်ကြီးပေါ်ပေါက်လာပြီးသိုးဆိတ်ထုတ်လုပ်တင်ပို့မှုမြှင့်တင်၍ ကျေးလက်နေ ပြည်သူများဝင်ငွေတိုးတက်လာစေရေးနှင့်လူမှုစီးပွားဖွံ့ဖြိုးတိုးတက်မှုမြင့်မားလာစေရေးတို့အတွက်သိုးဆိတ်မွေးမြူသူ များနှင့် တင်ပို့နေသူများ ကြုံတွေ့နေရသည့်  ထုတ်လုပ်မှုဆိုင်ရာအခက်အခဲများ၊စီးပွားရေးဝန်းကျင်ဆိုင်ရာ အတား  အဆီးများ၊ဈေးကွက်ဝင် ရောက်ခြင်းဆိုင်ရာ အဟန့်အတားများကို ဖော်ထုတ်ပြီးမဟာဗျူဟာလုပ်ငန်းစီမံချက် ရေးဆွဲ  သွားရန် ရည်ရွယ်၍ ပြုလုပ်ခြင်းဖြစ်ပြီး မျိုးကောင်းမျိုးသန့်သိုးဆိတ်များထုတ်လုပ်မှုမြှင့်တင်၍ လက်ရှိတင်ပို့နေသော တရုတ်ဈေးကွက်သာမက အခြားအလားအလာရှိသည့် ဒေသတွင်းဈေးကွက်များသို့  တိုးချဲ့တင်ပို့နိုင်ရေး၊ မွေးမြူရေး နည်းပညာနှင့်အလေ့အကျင့်ကောင်းများ တိုးတက်လာစေရန်နှင့် တန်ဖိုးမြှင့် Value  Added ထုတ်ကုန်များ တိုးမြှင့် ထုတ်လုပ်တင်ပို့နိုင်စေရန်တို့ကို ဦးစားပေးဆောင်ရွက်သွားမည်ဖြစ်ပြီး နိုင်ငံတကာဈေးကွက်သတင်းအချက်အလက် များလွယ်ကူလျင်မြန်စွာရရှိနိုင်ရေးနှင့် နိုင်ငံတကာအသိမှတ်ပြုလက်မှတ်များ ထုတ်ပေးနိုင်စေရေးတို့အတွက်  ကူညီ ဆောင်ရွက်ပေးသွားမည်ဖြစ်ကြောင်းသိရသည်။
အဆိုပါအလုပ်ရုံဆွေးနွေးပွဲသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးသန်းမြင့်၊မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာအောင်မိုးညိုနှင့်အစိုးရအဖွဲ့ဝင်ဝန်ကြီးများ၊ စားသုံးသူရေးရာဦးစီးဌာန၊မွေးမြူရေးနှင့်ကုသရေးဦးစီးဌာန၊ကုန်သွယ်ရေးဦးစီးဌာန၊ မြန်မာကုန်သွယ်မှုမြှင့်တင်ရေး အဖွဲ့၊ မြန်မာနိုင်ငံမွေးမြူရေးအဖွဲ့ချုပ်၊ သိုးဆိတ်မွေးမြူတင်ပို့မှုဖွံ့ဖြိုးတိုးတက်ရေးပေါင်းစပ်ညှိနှိုင်းရေးအသင်းများမှ တာဝန်ရှိသူများ၊သိုးဆိတ်တင်ပို့သည့်ကုမ္ပဏီများမှကိုယ်စားလှယ်များ၊ ပခုက္ကူခရိုင်အုပ်ချုပ်ရေးမှူး နှင့်ဌာနဆိုင်ရာ များ၊ ဒေသခံသိုးဆိတ်မွေးမြူရေးလုပ်ကိုင်သူများ တက်ရောက်ကြကြောင်းသိရသည်။
ဆလိုင်းကိုကီး

0 comments:

Post a Comment