Monday, May 8, 2017

နောက်ကြောင်းပြန် အရေးမယူရဘူးတဲ့လား

News Watch
နောက်ကြောင်းပြန် အရေးမယူရဘူးတဲ့လား
------ ------ ------ ------ ------
ယခုတလော လူပြောအများဆုံးကိစ္စမှာ ပြည်သူပိုင်ပစ္စည်းအလွဲသုံးစားမှုနှင့် ငွေကြေးအလွဲသုံးစားမှု တခုနှင့်ပတ်သက်၍ နောက်ကြောင်းပြန်အရေးယူမှု လုပ်မည်မဟုတ်ဟူသော စကားဖြစ်သည်။ ဒီစကားကို လူတွေက သေသေချာချာနားမလည်ကြ။ ဒီဥပဒေ တကယ်ရှိလို့ပဲ ပြောနေသလား၊ ဒါမှမဟုတ် ရဲရဲဝံ့ဝံ့ မလုပ်ရဲမကိုင်ရဲသဖြင့် ဆင်ဝှေ့ရန်ရှောင်ဆိုသလို ဆင်ခြေပေးနေသလားဟု တွေးတောကြသည်။ တကယ်တော့ ထိုသို့နောက်ကြောင်း မပြန်ရဆိုသော ဥပဒေမရှိပါ။ ၂၀၀၈ ဖွဲ့စည်းပုံအခြေခံဥပဒေ အခန်း (၁၄) ကူးပြောင်း ရေးကာလပြဋ္ဌာန်းချက်များ ပုဒ်မ ၄၄၅ တွင်“''ပြည်ထောင်စုသမ္မတ မြန်မာနိုင်ငံတော်သည် နိုင်ငံတော် ငြိမ်ဝပ်ပိပြားမှုတည်ဆောက်ရေးအဖွဲ့နှင့် နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီတို့၏ မူဝါဒလမ်းညွှန်မှုများ၊ ဥပဒေများ၊ နည်းဥပဒေများ၊ စည်းမျဉ်းများ၊ အမိန့်ပြန်တမ်းများ၊ ကြေညာချက်များ ကိုလည်းကောင်း၊ နိုင်ငံတော်ငြိမ်ဝပ်ပိပြားမှုတည် ဆောက်ရေးအဖွဲ့နှင့် နိုင်ငံတော်အေးချမ်းသာယာရေး နှင့်ဖွံ့ဖြိုးရေးကောင်စီတို့၏ ဆောင်ရွက်ချက်များ၊ တာဝန်များနှင့် ရပိုင်ခွင့်များကိုလည်းကောင်း ဆက်ခံသည်။ ယင်းအဖွဲ့(သို့မဟုတ်) အဖွဲ့ဝင်တဦးဦး၊ သို့မဟုတ် အစိုးရအဖွဲ့ဝင်တဦးဦး၏တာဝန်အရ ဆောင်ရွက်ချက် များအပေါ် အကြောင်းပြုလျက် ယင်းတို့အားတရားစွဲဆိုခြင်း၊ အရေးယူခြင်းမရှိစေရဟု ပါရှိလေသည်။
ထိုဥပဒေအရဆိုလျှင် စစ်အစိုးရလက်ထက် ၁၉၈၈ စက်တင်ဘာလ (၁၈) မှ ၂၀၁၁ မတ်လ သမ္မတဦးသိန်းစိန်ထံ အာဏာမလွှဲခင် အချိန်အထိ ၂၃ နှစ်တာကာလတွင် တာဝန်အရ ဆောင်ရွက်ခဲ့သည့်ကိစ္စများကို တရားစွဲဆိုခြင်းမပြုရဟု ဆိုလိုသည်။ ဒါတောင် တာဝန်အရဟူသော ၀ိသေသပါ သဖြင့် တာဝန်အရမဟုတ်ဘဲ ရာဇ၀တ်မှု၊ တရားမမှုများကျူးလွန်လျှင် ခံရဦးမည့်သဘောဖြစ်သည်။ ထားတော့ ဖွဲ့စည်းပုံအခြေခံဥပဒေက အကာအကွယ်ပေးထားသောဥပဒေမှာ ၂၀၁၁ မတိုင်မီကာလက ကိစ္စများဖြစ်သည်။ ၂၀၁၀ ရွေးကောက်ပွဲတွင် အနိုင်ရပြီး ၂၀၁၁ မတ်လ ၃၀ တွင် စတင်အသက်ဝင်လာသော ဦးသိန်းစိန်အစိုးရလက်ထက်တွင် အထက်ပါပုဒ်မ ၄၄၅ နှင့် ဦးသိန်းစိန်အစိုးရ အဖွဲ့သည် အကျုံးမ၀င်တော့ပါ။ ၂၀၀၈ ဖွဲ့စည်းပုံ အခြေခံဥပဒေက သမ္မတ၊ ပြည်နယ်နှင့်တိုင်းဒေသကြီး ၀န်ကြီးချုပ်များ၊ ၀န်ကြီးများ၊ ဒုဝန်ကြီးများကို အကာအကွယ်မပေးနိုင်တော့ပါ။ ကိုယ်အပြစ်လုပ်လျှင် ကိုယ်ခံရပါမည်။ ထိုအချက်ကို သမ္မတ(ဟောင်း)ဦးသိန်းစိန် ကောင်းကောင်းသိပါသည်။ ထို့ကြောင့် ၂၀၁၅ ရွေး ကောက်ပွဲတွင် NLD ပါတီမှ အပြတ်အသတ်နိုင်၍ ၂၀၁၆ မတ်လ ၃၀ တွင် အာဏာမှဆင်းပေးရတော့မည့်အချိန်တွင် ဦးသိန်းစိန်သည် သူ့နောင်ရေးအတွက် အကာအကွယ်ပေးနိုင်မည့် ဥပဒေတရပ်ကို ကြံ့ခိုင်ရေး စိုးမိုးနေသော လွှတ်တော် အဟောင်း နောက်ဆုံးအကြိမ် အစည်းအဝေး၌ သမ္မဟောင်း၏လုံခြုံရေးဥပဒေအဖြစ် ဖုတ်ပူမီးတိုက် ပြဋ္ဌာန်း သွားပါသည်။ ထိုဥပဒေအရ သမ္မတသက်တမ်းအတွင်း ဥပဒေအရဆောင်ရွက်ခဲ့သည်များကို တရားစွဲဆိုမှုမှ ကင်းလွတ်ခွင့်ကို ဦးသိန်းစိန်အပါအ၀င် နောင်လာမည့်သမ္မတအားလုံး ရရှိသွားပါသည်။ ထိုဥပဒေကြမ်းကို ပြည်ထဲရေးဝန်ကြီးဌာနကရေးဆွဲပြီး ဥပဒေကြမ်းကော်မတီမှတဆင့် ၂၀၁၅ ဒီဇင်ဘာ ၂၁ တွင် ပြည်သူ့လွှတ်တော်သို့ တင်သွင်းခဲ့ခြင်း ဖြစ်သည်။ ထို့နောက် တက်သုတ်ရိုက်အတည်ပြုခဲ့သည်။ သို့ရာတွင် ဤနောက်ကြောင်းပြန်တရားစွဲဆိုမှုမှ ကင်းလွတ်ခွင့်ဥပဒေ (သမ္မတဟောင်း၏ လုံခြုံရေးဆိုင်ရာဥပဒေ ၂၀၁၅) သည် သမ္မတ တဦးတည်းကိုသာ ကင်းလွတ်ခွင့်ပြုထားခြင်း ဖြစ်သည်။ ၀န်ကြီးချုပ်များ ကင်းလွတ်ခွင့်ထဲတွင် မပါဝင်ပေ။ ထို့ကြောင့် သမ္မတအနေနှင့် ကိုယ်လွတ်ရုန်းသော ဥပဒေဟု ထိုစဉ်က နိုင်ငံရေးအသိုင်းအ၀ိုင်းက ဝေဖန်ခဲ့ပါသည်။ ထို့ကြောင့် အတိုချုပ်ပြောရလျှင် ဦးသိန်းစိန်ဆင်းခါနီး ပြဋ္ဌာန်းခဲ့သောဥပဒေသည် သမ္မတ ဟောင်းဦးသိန်းစိန် တာဝန်အရဆောင်ရွက်မှုများကိုသာ နောက်ကြောင်းပြန်အရေးမယူရဟု ပြဋ္ဌာန်းခဲ့ခြင်းဖြစ်ပြီး ၀န်ကြီးချုပ်များမပါဝင်ပေ။ သမ္မတသော်မှ တာဝန်အရ၊ ဥပဒေနှင့်အညီ ဆောင်ရွက်ခဲ့မှုများကိုသာ တရားစွဲခံရမှု မှ ကင်းလွတ်ခွင့်ပြုခြင်းဖြစ်ပြီး တာဝန်အရမဟုတ်သော၊ ဥပဒေနှင့်အညီ မဟုတ်သောကိစ္စများကို ဘာလုပ်လုပ်ကင်းလွတ်ခွင့်ရထားခြင်း မဟုတ်ပေ။ ထိုစဉ်က ဥပဒေကြမ်းပေါ် ထွက်လာကာစအချိန်တွင် NLD မှ ဥပဒေပညာရှင် ဦးကိုနီ(ကွယ်လွန်)က ''ဒီဥပဒေအရဆိုရင် သမ္မတဟောင်းဟာ နောက်ထပ်တရားစွဲဆိုမှုတွေ ရင်ဆိုင်ရမယ့်အရေးကနေ အကာအကွယ်ရသွားတယ်၊ ဥပမာ သမ္မတအမိန့်ကို အကောင်အထည်ဖော်တဲ့ စီမံကိန်းမှာ မြေယာဆုံးရှုံးသွားသူတွေ၊ နောက်ပြီး ဆန္ဒပြပွဲတွေ ကို အကြမ်းဖက်နှိမ်နင်းရာကနေ အသက် သေဆုံးရတဲ့ဟာတွေ ဒါတွေကနေ သမ္မတဟာ တရားစွဲမခံရဘဲ အကာအကွယ်ရသွားမယ်။ ဒါပေမဲ့ သမ္မတဟောင်းတွေဟာ အဂတိလိုက်စားတာ၊ အာဏာအလွဲသုံးစားလုပ်တာတွေ ပေါ်ပေါက်လာရင်တော့ ဒီဥပဒေနဲ့ အကာအကွယ်ရမှာမဟုတ်ဘူး''ဟု ပြောခဲ့သည် (Ref: Myanmar Times 23 December 2015)။ ဒါဆို လျှင် နောက်ကြောင်းပြန်၍မရဟူသော ဥပဒေ ၂ ခု ကိစ္စကို နားလည်လောက်ပေပြီ။ ပထမတခုသည် စစ်အစိုးရ ကို အကာအကွယ်ပေးထားခြင်းဖြစ်ပြီး ဒုတိယတခုသည် သမ္မတဟောင်းဦးသိန်းစိန်ကို အကာအကွယ်ပေး ထားခြင်း ဖြစ်သည်။
ယခုဖြစ်နေသောကိစ္စသည် ထိုနှစ်ခုနှင့်မဆိုင်ပါ။ အားလုံးသိကြသည့်အတိုင်း မကွေးတိုင်းဒေသကြီး အစိုးရ အဟောင်းနှင့် အစိုးရအသစ် အာဏာလွှဲပြောင်း စာရင်းရှင်းလင်းပေးအပ်ရာတွင် စာရင်းပျောက်နေသော ဒေသဖွံ့ဖြိုးရေးရန်ပုံငွေ ကျပ်သန်း ၇၀၀၀ ကျော် ပြဿနာဖြစ်သည်။ တိတိကျကျပြောရလျှင် ကျပ်သန်းပေါင်း ၇၄၅၉ သန်းဖြစ်သည်။ ကျပ်သိန်းခုနစ်သောင်း လေးထောင်ကျော်ဖြစ်သည်။ တနေ့လုပ်အားခ၀င်ငွေ ၃၆၀၀ ကျပ်သာရရှိသော ဆင်းရဲလှသည့် နိုင်ငံတွင် ထိုပျောက်ဆုံးနေသောငွေမှာ စက်မှုဇုန်နေ့စားအလုပ် သမားလေးတယောက်၏ ၁၉၆၂၈၉၄ ရက်လုပ်ခဖြစ်သည် (၅၃၇၇ နှစ် လုပ်အားခဖြစ်သည်)။ တဘ၀လျှင် အနှစ် ၈၀ နှုန်းဖြင့် အလုပ်လုပ်ခဲ့ပါက ၆၇ ဘ၀ လုပ်အားခဖြစ်သည်။ မည်သူမျှလည်း အနှစ် ၈၀ အလုပ်မလုပ်နိုင်ပါ။ ထားတော့။ ထိုငွေများပျောက်နေပါသည်။ ပြည်ထောင်စုအဆင့် ပြည်ထဲရေးဝန်ကြီးဌာနမှ စစ်လို့ကတော့အဖြေပေါ်လာသည်။ ကျပ်သန်း ၁၇၀၀ ကို ယခင်မကွေးတိုင်းဒေသကြီး ၀န်ကြီးချုပ် ဦးဘုန်းမော်ရွှေက ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီအတွက် သုံးထားသည်ဆို၏ (ဒါကို ပြည်ခိုင်ဖြိုးပါတီ ပြောရေးဆိုခွင့်ရှိသူ ဒေါက်တာနန္ဒာလှမြင့်က ငြင်းသည်)။ နောက်ထပ်သန်း ၁၅၇၀ အား ရွှေသုခ ငွေစုငွေချေး လုပ်ငန်းတွင် ချေးထားသည်ဆို၏။ နိုင်ငံပိုင်ပိုက်ဆံကို ထိုသို့ ကိုယ့်စိတ်ထင်သလိုထုတ်ချေးလို့ ရမရကိစ္စမှာ လည်း ရှင်းရမည့်ကိစ္စဖြစ်သည်။ ကျန်ကျပ်သန်းပေါင်း ၄၀၀၀ ကတော့ မည်သည့်နေရာသို့ ရောက်သွားသလဲ ဆိုတာ ယခုအထိ ရှင်းရှင်းလင်းလင်း မသိရပေ။ ပြောရလျှင် ဤကိစ္စ၌ မလည်ရှုပ်ဖြစ်နေသော မရှုပ်မရှင်းပြဿနာများစွာ ပါဝင်နေပါသည်။ ခုရှုပ်မှနောင်ရှင်းဆိုသလို လက်ငင်းအရေးယူဆောင် ရွက်ရမည့်ကိစ္စ များစွာရှိပါသည်။ မေးရမည့်မေးခွန်း များစွာရှိပါသည်။ အဓိကသိချင်သောမေခွန်းများမှာ ပြည်နယ်အစိုးရမှ ထိန်းသိမ်းစောင့်ရှောက်ထားသော နိုင်ငံတော်ပိုင်ပိုက်ဆံကို စာရင်းမပြဘဲ သိုဝှက်ထားပြီး စာရင်းစစ်က ဖော်ထုတ်တွေ့ရှိမှရှိသည်ဟု ၀န်ခံခြင်းသည် ခိုးမှုမြောက်၊ မမြောက် ဖြစ်သည်။ ခိုးမှုမဟုတ်ခဲ့လျှင် ပြည်သူပိုင်ပစ္စည်းကာကွယ်စောင့်ရှောက်သည့် ဥပဒေပုဒ်မ ၆(၁)နှင့် ငြိ၊မငြိ ဖြစ်သည်။ ကျွန်တော် ကြားဖူးသည်ကတော့ နိုင်ငံတော်ပိုင် မီးရထားသံလမ်း ကလေး သုံးပေလောက်၊ ကြေးနန်းကြိုးကလေး ကိုက် ၂၀ လောက်ခိုးမိသူကိုပင် ပြည်သူပိုင်ပစ္စည်း ကာကွယ်ရေးဥပဒေ ၆(၁)ဖြင့် ဖမ်းဆီးအရေးယူခဲ့ကြဖူးလေသည်။ ယခု အလွဲသုံးထားသောငွေမှာ အထက်တွင်ရေးခဲ့သလို ဆင်းရဲသားတယောက် အူဝဲမှသေသည်အထိ လူ့ဘ၀ ၆၇ ဘ၀ဆက်တိုက် ရှာဖွေစုဆောင်းမှ ရနိုင်လောက်သော ငွေများဖြစ်သည်။ ထိုငွေများအလွဲသုံးခြင်းသည် အာဏာအလွဲသုံးစားခြင်း မဟုတ်ဘူးလား၊ ပြည်သူပိုင်ပစ္စည်းကို အလွဲသုံးစားလုပ်ခြင်းမဟုတ်ဘူးလား။ သာသနာရေးဝန်ကြီးဟောင်း ဦးဆန်းဆင့်ကတော့ ကျပ်သိန်း ၇၀ ဘုရားတည်ရာတွင် အလွဲသုံးစားခဲ့သည် ဆိုသည့် စွပ်စွဲချက်ဖြင့် ထောင်ဒဏ် ၁၃ နှစ်နှင့် ဒဏ်ငွေတသိန်းချမှတ်ခံခဲ့ရလေသည်။ သိန်း ၇၀ အမှုကို သမ္မတဦးသိန်းစိန်က ဖိဖိစီးစီးကိုင်တွယ်ပြီး ထောင် ၁၃ နှစ်အပြစ်ပေးခဲ့သော်လည်း နိုင်ငံရေးအရ အကွက် ဆင်အပြစ်ရှာခံရသည်ဟု အများက ယုံကြည်ပေသည်။
ယခုအမှုကတော့ ရှင်းသည်။ ဥပဒေတွင် မရိုးဖြောင့်သောသဘော ရှိ၊မရှိကို အဓိကထားပြီး ကြည့်ရသည်။ ၀န်ကြီးချုပ်ဟောင်းဦးဘုန်းမော်ရွှေ ဦးဆောင်သော မကွေးတိုင်းဒေသကြီး အစိုးရအဖွဲ့ဟောင်းသည် ၀န်ကြီးချုပ်အသစ် ဦးအောင်မိုးညို ဦးဆောင်သော အစိုးရအသစ်ထံသို့ အစိုးရငွေများ ပြောင်းလဲပေးအပ်ရာတွင် ရေနံလက်ယက်တွင်းများမှရသော ဒေသဖွံ့ဖြိုးရေးရန်ပုံငွေများကို ပိုက်ဆံလည်း မပေး၊ စာရင်းလည်းမပြဘဲ ထွက်ခွာသွားခြင်းမှာ မရိုးဖြောင့်သော သဘောဖြစ်နေပါသည်။ ထိုမရိုးဖြောင့်မှုကို ဥပဒေအတိုင်းသာ အရေးယူ ရမည်ဖြစ်သည်။ အရေးယူ၊ မယူသည် NLD အစိုးရသည် ပြစ်မှုနှင့် ပြစ်ဒဏ်အပေါ် မည်သို့သဘောထားသည်၊ ဥပဒေဆိုသည်မှာ ဘာကိုဆိုလိုသည်ဆိုခြင်းကို စာမေးပွဲစစ်မည့်သဖွယ် ဖြစ်လာပါသည်။ နောက်ကြောင်း ပြန်အရေးယူလို့မရဟူသည့်ဥပဒေသည် ၀န်ကြီးချုပ်ဟောင်းများ ၂၀၁၀ နောက်ပိုင်းဝန်ကြီးဟောင်းများ အတွက်မရှိကြောင်း ပြောခဲ့ပြီးပါပြီ။ ရှင်းနေပါပြီ။ ဥပဒေတွင် ငါ့ဘကြီးမို့၊ ငါ့အဖေမို့၊ ငါ့ဆရာမို့၊ ငါ့တပည့်မို့၊ မျက်နှာနာရလို့၊ ငါ့ဆရာမကတားထားလို့ဟူသည် မရှိရပါ။ ဥပဒေအရာတွင် ဆင်းရဲသားနှင့်ဝန်ကြီးချုပ်သည် အတူတူဖြစ်ရပါမည်။ ဆင်းရဲသားကြေးနန်းကြိုး တဆယ်သားခိုးခြင်းသည် သူ့ဝမ်းရေးအတွက်ဖြစ်၍ ဖြေတွေးတွေးပေး၍ ရသေးသည်။ ဘ၀ပေါင်းများစွာ စားမကုန်နိုင်အောင် နိုင်ငံ့ဘဏ္ဍာခိုးကြခြင်းမှာကား မည်သည့်အကြောင်းပြချက်နှင့်မှ ခွင့်လွှတ်ထိုက်သောကိစ္စများ မဟုတ်ပါ။ သို့ရာတွင် နောက်ကြောင်းပြန် မလှန်ရေးမူဝါဒအရ ၀န်ကြီးချုပ်ဟောင်းကို အရေးမယူဟု သမ္မတရုံးပြောရေးဆိုခွင့်ရှိသူ ဦးဇော်ဌေးက ပြော ကြားခဲ့တာကို ကြားရတော့ အံ့သြမိသည်။
ယခုအခါ ထိုစာရင်းပျောက် နေသောငွေများအနက် ၀န်ကြီးချုပ် (ဟောင်း) ဦးဘုန်းမော်ရွှေက ကျပ်သန်း ၁၇၀၀၊ ရွှေသုခငွေစုငွေချေးလုပ်ငန်းမှ ကျပ်သန်း ၁၅၇၀ ကို အရစ်ကျစနစ်နှင့် ပြန်လည်ပေးအပ်ပါမည်။ မော်တော်ယာဉ် လေးစီး၊ စက်လှေ ၂ စီး၊ ဘက်ဟိုး ၁ စီး ပြန်လည်ပေးအပ်မည်ဟု ဦးဘုန်းမော်ရွှေက ဆက်သွယ်လာကာ မော် တော်ယာဉ်များ ပြန်လည်ပေးအပ်ခဲ့လေသည်။ ဦးဘုန်းမော်ရွှေမှ ဒေါက်တာအောင် မိုးညို(မကွေးတိုင်းဒေသ ကြီးအစိုးရ လက်ရှိဝန်ကြီးချုပ်)ထံ ၂၀၁၇ ဧပြီလ ၂၇ ရက်နေ့စွဲဖြင့် ပေးအပ်သောစာအရ ရွှေသုခ အသေးစား ငွေချေးလုပ်ငန်းသို့ ပေးအပ်ထားသောငွေ (၁ ဒသမ ၅၇) ဘီလီယံကျော်အနက် ငွေကျပ်သိန်း (၅၀၀၀)အား မေလ ပထမပတ်အတွင်း၊ ကျန်ငွေများမှာလုပ်ငန်းလည်ပတ်လျက်ရှိနေသောကြောင့် ၂၀၁၇ ဇူလိုင်လ နောက်ဆုံးပတ်မတိုင်မီ ပေးသွင်းသွားမည်ဟု ဖော်ပြခဲ့သည်။ ထို့အပြင် အပိုဒ်(က)တွင် ဖော်ပြခဲ့သော ငွေကျပ် (၁ ဒသမ ၇)ဘီလီယံအား ၂၀၁၇ ဇူလိုင်လ နောက်ဆုံးအပတ်မတိုင်မီ တိုင်းဒေသကြီးအစိုးရအဖွဲ့ထံသို့ ပေးသွင်း သွားမည်ဖြစ်ပါသည်ဟု ဖော်ပြထားလေသည်။ သူတို့ပြောသလိုဆိုလျှင် ကျပ်သန်း ၃၀၀၀ ကျော်ကိုသာ တယောက်က သန်း ၁၅၇၀၊ တယောက်က သန်း ၁၇၀၀ နှစ်ရစ်ခွဲ၍ပြန်ဆပ်မည့်သဘော ဖြစ်သည်။ ကျပ်သန်း ၄၀၀၀ ကျန်နေသေးတာတော့ ဘာမှရှင်းပြထားခြင်းမရှိပေ။ တဖန် စာရင်းဖျောက်ထားသောငွေများ စာရင်းပေါ် လာသောအခါမှ ပြန်ပေးပါ့မယ်ဟုပြောခြင်းဖြင့် အမှုတခုကို အပြီးသတ်၍ရသလားဟု မေးချင်ပါသည်။ ရွှေသုခ အသေးစားငွေ ရေးကြေးရေးလုပ်ငန်းဆိုသည်မှာ ဘယ်သူပိုင်သော လုပ်ငန်းနည်း။ နိုင်ငံတော်ပိုင်ရမည့် ပိုက်ဆံများသည် အဘယ်ကြောင့် ရွှေသုခဆိုသော ငွေချေးလုပ်ငန်းသို့ ရောက်သွားသနည်း။ ရွှေသုခသည် ဗဟိုဘဏ်က တရားဝင်ခွင့်ပြုထားသော ငွေရေးကြေးရေး အဖွဲ့အစည်းဟုတ်၊ မဟုတ်။ ထိုရွှေသုခ လက်ထဲသို့ငွေများ မည်သည့်အချိန်ကတည်းကရောက်နေသနည်း။ မည်သည့်အတိုးနှုန်းများ ရယူခဲ့သနည်း ဆိုတာလည်း ယခု ဒေါက်တာအောင်မိုးညိုတို့အစိုးရက ဤအမှုတွင် ပါဝင်ပတ်သက်သူများကို မေးမြန်းစိစစ်ပြီး ပြည်သူလူထုကို အသိပေးတင်ပြရမည်ဖြစ်သည်။
ကလေးတောင်သိသည့်ကိစ္စမှာ ငွေကိုဘဏ်တွင် အပ်ထားလျှင် အတိုးရပါသည်။ နည်းလျှင်နည်း သလောက်၊ များလျှင်များသလောက်၊ အလွန်များလျှင် အလွန်များများ အတိုးရပါသည်။ ဘဏ်များ၏သာမန် အပ်ငွေ အတိုးနှုန်းမှာ တနှစ်လျှင်ပျမ်းမျှ ၈ ဒသမ ၂၆ ရာခိုင်နှုန်းရှိပါသည်။ Saving အတွက် အတိုးသတ်သတ်၊ Call အတွက် သိန်းတရာအထက်အပ်လျှင် အတိုး တနှစ် ၈ ရာခိုင်နှုန်း၊ Fixed Deposit အတွက် (၁)လ အပ်လျှင် အတိုး ၉ ရာခိုင်နှုန်း၊ (၃)လဆိုလျှင် ၉ ဒသမ ၅ ရာခိုင်နှုန်း၊ (၆)လအပ်လျှင် ၉ ဒသမ ၇ ရာခိုင်နှုန်း၊ (၁)နှစ်အပ်လျှင် ၁၀ ရာခိုင်နှုန်းပေးပေသည်။ ဘဏ်တခုနှင့်တခု အနည်းငယ်သာ ကွာခြားပေသည်။ ထားတော့ပုံမှန်အပ်ငွေဖြစ်သော Saving နှင့် တွက်လျှင်ပင် ငွေတသိန်းတနှစ်အပ်ထားလျှင် ဘဏ်တိုး ရှစ်ထောင့်နှစ်ရာ့ခြောက်ဆယ်ကျပ်ရပေမည်။ ကျပ်သန်းပေါင်း ၁၅၇၀ ကို တနှစ်ဘဏ်တွင် အပ်ထားလျှင် အတိုး ၁၂၉၆ သိန်းရပါမည်။ ဒါကတနှစ်အတွက် တွက်တာဖြစ်သည်။ ထိုငွေများသည် ရွှေသုခလက်ထဲသို့ ဘယ်အချိန်ကတည်းကရောက်၍ ဘယ်လောက်အထိ လှည့်ပတ်သုံးစွဲနေသနည်း။ ဘာမှမလုပ်ဘဲ ဘဏ်မှာ အပ်ထားလျှင်ပင် တနှစ်သိန်းတထောင့်နှစ်ရာကျော် (တလအတိုး ၁၀၈ သိန်း) အသားတင်ရနိုင်ပေသည်။ ထိုအတိုးငွေအမြတ်ငွေများ ဘယ်ရောက်သွားသနည်း။ ထို့အပြင် ၀န်ကြီးချုပ်ဟောင်းဦးဘုန်းမော်ရွှေ ပြန်အပ်မည်ဆိုသော ကျပ်ငွေ ၁ ဒသမ ၇ ဘီလီယံသည်လည်း ဤအတိုင်းပင် ဖြစ်သည်။ ဘဏ်တိုးသိန်း ၁၄၀၄ သိန်း နှစ်စဉ်အတိုးရပေမည်။ ယခုပြန်ပေးသော ငွေများမှရသော အတိုးအပွားများ မည်သူယူမည်နည်း။ မည်သူ ရသွားသနည်း။ စာရင်းဖျောက်ငွေများကိုပေါ်လာကာမှ အရင်းသာ ခပ်တည်တည်ပြန်အပ်ခြင်းကို ဥပဒေက လက်ခံမခံတော့မသိ၊ ထိုသို့လက်ခံလျှင် ကျွန်တော်လည်း နိုင်ငံတော်ဘဏ္ဍာထဲမှ သန်းတထောင်လောက် တနှစ်လောက်လှည့်ထားချင်သည်။ ပြန်ဆပ်ရမည့်အချိန်တွင် တပြားမချန် တိတိကျကျပြန်ပေးပါမည်။ ဘဏ်မှာပဲအပ်ထားပြီး အတိုးပဲထိုင်စားနေမည်ဖြစ်သည်။ အပင်ပန်းခံ၍စာမရေးလို၊ တိုးရစ်ဂိုဒ် မလုပ်လို၊ ၀န်ကြီးချုပ်အဟောင်းတို့ ရွှေသုခငွေစုငွေ ချေးလုပ်ငန်းတို့လိုပဲ ဆောင်ရွက်ချင်သည်။ မပေါ်ရင်ယူထား၊ ပေါ်ရင်ပြန်ပေး၊ အတိုးတွေစားဘယ်လောက်ကိုက်သနည်း။ ၂-၅-၂၀၁၇ Eleven နေ့စဉ်သတင်းစာထဲတွင် ကာတွန်းတကွက်ပါလာသည်။ ကာတွန်းထဲတွင် ရဲစခန်းတာဝန်မှူးရှေ့သို့ မျက်နှာဖုံးစွပ်နှင့်လူများ တန်းစီပြီး ရောက်လာကြသည်။ လက်ထဲမှာ အထုပ်အပိုးတွေကိုင်ထားသည်။ ခိုးထားတဲ့ပစ္စည်းပြန်အပ်ရင် နောက်ကြောင်း ပြန်အရေးမယူဘူးဆိုလို့ ဒီမှာတရားခံတွေ ပစ္စည်းပြန်လာအပ်နေကြတယ် ဆရာ၊ ရှင်းပေးပါဦးဟု ရဲက အော် နေပုံဖြစ်သည်။ လက်ရှိမြန်မာ့ တရားစီရင်ရေးကို ထင်ဟပ်နေသောကာတွန်းဖြစ်သည်။ စံတော်ချိန် သတင်းစာထဲတွင်တော့ တရားခွင်တွင် တရားခံဖြစ်သူက ၀က်ခြံထဲမှာထိုင်နေရာက တရားသူကြီးကိုမေးနေ သည်။ တရားသူကြီးမင်းက မျှမျှတတ စီရင်မှာလား။ တရားသူကြီးက ဖြေသည်။ ဒါပေါ့ ကျုပ်က ဥပဒေနဲ့အညီ မျှမျှတတပဲ။ ဒါဆို ကျွန်တော်နှိုက်ယူထားတဲ့ ငွေခုနစ်ထောင်ကို အရစ် ကျပြန်ပေးမယ်၊ ကျွန်တော့်ကို ပြန်လွှတ် ပေးတော့။ ဟူ၍ဖြစ်သည်။ ကျွန်တော်စဉ်းစားမိသည်မှာ ဤကိစ္စကို အတုယူပြီး အစိုးရ၀န်ထမ်းအားလုံးက နိုင်ငံတော် ဘဏ္ဍာငွေများကို လှည့်သုံးကြလျှင် ဘယ်လိုလုပ်မလဲဟူ၍ ဖြစ်သည်။ ၀န်ကြီးချုပ်များက အတုမြင် အတတ်သင် ယခုလိုအတုယူ ငွေတွေသုံးကုန်လျှင် မခက်ဘူးလား။ မကောင်းသောဥပမာတခု စီရင်ထုံးတခုလို စံပြ ဖြစ်သွားမှာကိုတော့ စိုးရိမ်မိပါသည်။
နောက်ကြောင်းပြန်အရေးယူခြင်းမယူခြင်းသည် နိုင်ငံရေးကိစ္စဖြစ်သည်။ အမျိုးသားပြန်လည်သင့်မြတ် ရေးဆိုသည်မှာ နိုင်ငံရေးကိစ္စဖြစ်သည်။ သို့သော် တရားဥပဒေဆိုသည်မှာ နိုင်ငံရေးမဟုတ်။ မည်သို့မျှ အလျှော့အတင်းလုပ်၍မရ။ ဟိုလူ့ကျတမျိုးသည်လူ့ ကျတမျိုး ဟိုအဖွဲ့ကိုတမျိုး သည်အဖွဲ့ကိုတမျိုးလုပ်၍ မရ။ ထိုသို့လုပ်လျှင် ဥပဒေကိုမည်သူကမျှ လေးစားတော့မည်မဟုတ်။ နိုင်ငံတနိုင်ငံတွင် နိုင်ငံသားများသည် တရားဥပဒေကို အယုံအကြည်ကင်းမဲ့လျှင် တိုင်းပြည်ပျက်ပြီဖြစ်သည်။ ဥပဒေအရာတွင် ကျောသားရင် သားမခွဲခြားဘဲ ဤအမှုကို စီရင်ကိုင်တွယ်သင့်ပါ၏။ ဤသည်မှာ နောက်ကြောင်းပြန်မလှန်ရေးမူဝါဒကို ပြောင်းလဲခြင်းမဟုတ်။ နောက်ကြောင်းပြန်လှန်ခြင်းပင် မဟုတ်။ NLD အစိုးရလက်ထက်တွင် ဖြစ်ခဲ့သော ဥပဒေမဲ့ပြုကျင့်မှု ဖြစ်သည်။ ဥပဒေမဲ့မှုပြုကျင့်မှုတခုကို ယခင်ကဖြစ်သလိုလိုဖြင့် မမြင်ချင်ယောင်ဆောင်လိုက် လျှင် ဥပဒေမဲ့ပြုကျင့်မှုများကို မည်သည့်အခါမှရပ်တန့်နိုင်တော့မည် မဟုတ်။ ပမာအားဖြင့် အိမ်ငှားအသစ် တက်လာသောအခါ အရင်အိမ်ငှားအဟောင်းအိမ်မှ ပစ္စည်းအချို့ယူသွားတာသည် နောက်ကြောင်းမဟုတ်၊ လက်ရှိ မိမိလက်ထက်တွင်ဖြစ်ပေါ်လာသော မျက်မှောက်ကိစ္စ၊ ပစ္စုပ္ပန်ကိစ္စဖြစ်သည်။ အစိုးရဆိုသည်မှာ နိဗ္ဗာန် ဆော်မဟုတ်။ နတ်ပြည်ရောက်ကြောင်းတရား ဟောနေရသူမဟုတ်။ ရေလိုမီးလိုကျင့်ကြံရသည်။ ယခု စာသည် ယခင်အစိုးရအဖွဲ့ကို မုန်းလို့ရေးသည်မဟုတ်။ မည်သူ့ကိုမှ နစ်နာစေချင်၍ မဟုတ်။ ဥပဒေကအုပ်ချုပ်သော နိုင်ငံကိုလိုလားသဖြင့် ရေးသောစာဖြစ်သည်။ လူက အုပ်ချုပ်တာထက် တရားဥပဒေက အုပ်ချုပ်တာကို ကျွန်တော်တို့လိုလားသည်။ ဟိုလူကိုတမျိုးသည် လူကိုတမျိုးဥပဒေက ဘက်လိုက်ကာကွယ်နေတာတွေကို ကျွန်တော်တို့ စစ်အစိုးရလက်ထက်ကတည်းက စိတ်ကုန်လှပြီ။ အဖွဲ့အစည်းတခုထံမှ မျက်နှာသာ ရချင်တာနှင့် မျက်နှာချိုသွေးနေရသော မျက်နှာချိုသွေး နိုင်ငံရေးကိုလည်း စိတ်ကုန်လှပြီ။ ဥပဒေအထက်မှာ ဘယ်သူမှ မရှိဘူးဆိုသော ဓားဖြင့် နောက်ကြောင်းပြန် မလှန်ရေးဆိုသောကြိုးတွေနဲ့ မိမိကိုယ်ကို တုတ်နှောင် ထားတာတွေ ဖြတ်ချလိုက်ပါ။ ဖုန်တွေ၊ သဲတွေ၊ ပင့်ကူ မျှင်တွေကိုဖယ်ချပြီး ဆက်လျှောက်မှသာ သာယာ ဖြောင့်ဖြူးသော လမ်းမှန်ကို တွေ့ပါလိမ့်မည်။ ပင့်ကူမျှင်တွေကိုမဖယ်ဝံ့ဘဲ တသသလုပ်နေလျှင် ကိုယ်ပါ ရော၍ ဖုန်တောထဲမှာ လမ်းပျောက်သွားပါမည်ခင်ဗျား။
သရ၀ဏ်(ပြည်)

0 comments:

Post a Comment