Wednesday, April 5, 2017

အနန္တဂိုဏ်းဝင်အဖေ

***အနန္တဂိုဏ်းဝင်အဖေ***
နှလုံးသားနူးညံ့သူအဖေဟာ
ပန်းတွေကိုပျိုးတယ်
ပန်းတွေအကြောင်းပြောပြတယ်
ပန်းတွေကိုမြတ်နိုးတတ်လာအောင်သင်ပေးတယ်
ပုံပြင်တွေပြောပြဖူးတယ်
တိရစ္ဆာန်ရုံတွေလိုက်ပြဖူးတယ်
ရုပ်ရှင်တွေလိုက်ပြဖူးတယ်။

ဟောင်းနွမ်းစုတ်ပြတ်နေတဲ့စွပ်ကျယ်လေးဟာ
အဖေ့ရဲ့ဒုတိယဇနီး
ညစ်ပေပေါက်ပြဲနေတဲ့လုံချည်လေးဟာ
အဖေ့ရဲ့ဒုတိယမိဖုရား
သဲကြိုးသံရိုက်ထားတဲ့ဖိနပ်လေးဟာ
အဖေ့ရဲ့ဒုတိယကြင်ယာတော်ပေါ့
သားသမီးတွေအတွက်ဆိုအဖေ့ဘဝကိုအဖေ
ကျေကျေနပ်နပ်ကြီးပျော်နေခဲ့တယ်။

အဖေ့လက်ကြမ်းကြီးတွေနဲ့
သားသမီးတို့ဘဝနုစေခဲ့တယ်
ရှေ့ဆုံးကမားမားရပ်တယ်
ခလုတ်တွေဆူးတွေငြောင့်တွေရှင်းပေးတယ်
တွဲခေါ်တယ်ဆွဲခေါ်တယ်
ပိုးခေါ်တယ်ထမ်းခေါ်တယ်
တွန်းပို့တယ်မြှောက်တင်တယ်
သားသမီးတို့အမြင့်ရောက်ရင်
ကြည့်ပြီးပြုံးနေတတ်တယ်
မျှော်လင့်ချက်မပါတဲ့အပြုံးတွေနဲ့ပေါ့။

အဖေအမြဲသွန်သင်လမ်းပြတယ်
ပညာရေးနဲ့သူငယ်ချင်းလုပ်ခိုင်းတယ်
လူမှုရေးနဲ့အထည်တဝင်နေခိုင်းတယ်
စာနာမှုနဲ့လက်တွဲခိုင်းတယ်
ကိုယ်ချင်းစာတရားနဲ့အဖော်ပြုခိုင်းတယ်
ရိုးသားမှုနဲ့အိပ်စက်ခိုင်းတယ်
ယဉ်ကျေးမှုကိုရှိခိုးခိုင်းတယ်
အောင်မြင်မှုဆီမှာတပည့်ခံခိုင်းခဲ့တယ်။

အဖေ…အဖေ…အဖေ
သားသမီးတွေအတွက် အဖေ
ဒါရိုက်တာကြီး အဖေ
ဇာတ်ညွှန်းဆရာကြီး အဖေ
ဇာတ်လိုက်မင်းသားကြီး အဖေ
လူကြမ်းကြီး အဖေ
ပန်းပုဆရာကြီး အဖေ
ဥယျာဉ်မှူးကြီး အဖေ
မေတ္တာတွေဝေနေတဲ့ အဖေ
ကရုဏာရှင် သခင်အဖေ
အနန္တဂိုဏ်းဝင် အဖေ
ဦးထိပ်တင်ပါတယ် အဖေ………………………………………။   ။
                                                      ဉာဏကျော်

0 comments:

Post a Comment