Monday, May 11, 2015

သမိုင်းဝင် မင်းလှခံတပ်ကြီး ရှေးမူမပျက် ထိန်းသိမ်းဆောင်ရွက်




မင်းလှ     မေ     ၁၀
          မကွေးတိုင်းဒေသကြီး သရက်ခရိုင် မင်းလှမြို့ သမိုင်းဝင် မင်းလှခံတပ် အဆောက်အဦးအား ရေရှည်တည်တံ့စေရေးအတွက် တိုင်းဒေသကြီး အစိုးရအဖွဲ့၏ ကြီးကြပ်လမ်းညွှန် စီမံမှုဖြင့် ဧရာဝတီမြစ်ရေ တိုက်စားခြင်းမှကာကွယ်ထိန်းသိမ်းခြင်း၊ ခံတပ်ကြီး ရှေးမူမပျက် အစဉ်တည်ရှိနိုင်ရန် ဆောင်ရွက်မှုများ ကြောင့် တိုင်းဒေသကြီး၏ ဂုဏ်ဆောင်ကာ မင်းလှမြို့ရဲ့ ကျက်သရေဆောင် အဖြစ်တည်ရှိနေပေသည်။

          မင်းလှခံတပ်ကြီးသည် မြေပေါ်ခံတပ်အမျိုးအစားဖြစ်ပြီး မင်းတုန်းမင်းတရားကြီးနှင့် အိမ်ရှေ့စံ ကနောင်မင်းတို့မှ ၁၂၂၃ ခုနှစ်တွင်တည်ဆောက်ခဲ့ပြီး အောင်ကြောင်းကြံစည်ခံတပ်သည် ဟုအဆိုရှိခဲ့သည်။ အဆိုပါ ခံတပ်ကြီးကို အီတလီလူမျိုး ကွန်မိုတို၊ပြင်သစ်လူမျိုး မိုလီနာရီနှင့်နိုင်ငံခြားပြန် မြန်မာစစ်ဖက် အင်ဂျင်နီယာ လူငယ်များက တည်ဆောက်ခဲ့ကြပြီး (ယခင်ငွေကြေး)မြန်မာဒေါင်းဒင်္ဂါး(၇၀၀၀၀)ကျော် ကုန်ကျခဲ့ကြောင်း သိရသည်။

          မင်းလှခံတပ်ကြီးမှာ စတုဂံပုံအဆောက်အဦးဖြစ်ပြီး အပြင်ဘက်ဆုံးတွင် အုတ်နံရံတစ်ခုအား စတုဂံပုံ တည်ဆောက်ထားသည်၊အတွင်းဘက်နံရံကိုလည်း စတုဂံပုံတည်ဆောက်ထားပြီး အပြင်အုတ်နံရံ နှင့် အတွင်း အုတ်နံရံများအကြားတွင် မြေသားဖြည့်ဆောင်ရွက်ထားသည်၊အုတ်နံရံနှစ်ခုအကြား မြေသား များပတ်လည်ဖို့ပြီး အရှေ့ဘက်နှင့်အနောက်ဘက် (မြစ်ဘက်နှင့်လမ်းဘက်) တို့တွင် ဗဟိုဝင်ပေါက်  များထားရှိသည်၊ခံတပ်အပြင်ဘက်ဆုံးနံရံများ၏ အတိုင်းအတာမှာ အလျှား (၁၇၃ ပေ ၇ လက်မ)၊အနံ (၁၃၁ ပေ ၄ လက်မ)၊အမြင့် (၂၅ ပေ ၉ လက်မ)ဖြစ်သည်၊အတွင်းနံရံပတ်လည်တွင် အခန်းများ ဖွဲ့စည်းထားပြီး အလယ်တွင်ကွက်လပ်ထားရှိသည်၊အလယ်ကွက်လပ်မှ မြေသားဖြည့်ခံတပ်ပေါ် သို့တက် ရန် တောင်နှင့် မြောက်တို့တွင်တက်ဆင်းလှေခါးနှစ်ခုစီ ထည့်သွင်းတည်ဆောက်ထားပြီး ခံတပ်၏ အနောက်ဘက် ဗဟိုဝင် ပေါက် ၀ဲ-ယာ တွင်လျောစောက်အတက်အဆင်းများပြုလုပ်ထားသည်၊ အလေးဝန်များသော အမြှောက်များ အားဆွဲတင်ရန် မူလက ရထားသံလမ်းပါ ထည့်သွင်းတည်ဆောက် ထားကြောင်း သိရသည်။

          အုတ်များဖြင့် စနစ်တကျတည်ဆောက်ခြင်း ပေါင်းကူး(Arch)များအား စနစ်တကျ အုတ်စီထားခြင်း လှေခါးများအား လုပ်ငန်းလိုအပ်ချက်အလိုက် စနစ်တကျစီစဉ်ထည့်သွင်းတည်ဆောက်ခြင်း၊ ရန်သူအား တိုက်ခိုက်ချေမှုန်းရာတွင်အားသာချက်များစွာ ထည့်သွင်းဆောင်ရွက်ထားခြင်းဖြစ်ကြောင်း လေ့လာတွေ့ရှိ ရသည်။မင်းလှခံတပ်သည် မြန်မာတို့၏ ဇာတိမာန်၊နည်းပညာအဆင့်အတန်း မျိုးချစ်စိတ်ဓာတ်တို့အတွက် ထင်ရှားဆုံးသော ပြယုဂ်တစ်ခုအဖြစ် ယနေ့ထက်တိုင် ရှေးမူမပျက် ထိန်းသိမ်းဆောင်ရွက်ထားရှိမှုကို တွေ့မြင်နိုင်ပါသည်။
          သမိုင်းဝင် မင်းလှခံတပ် အဆောက်အဦးကြီး ရေရှည်တည်တံ့စေရန် တိုင်းဒေသကြီးဝန်ကြီးချုပ် ၏စီမံလမ်းညွှန်မှုဖြင့် ဧရာဝတီမြစ်ရေ တိုက်စားခြင်း ထိန်းသိမ်းကာကွယ်ရန် တိုက်ရိုက်ကာကွယ်မှု လုပ်ငန်းနှင့် သွယ်ဝိုက်ကာကွယ်မှုလုပ်ငန်းနှစ်မျိုးဖြင့် ရေအရင်းအမြစ်နှင့်မြစ်ချောင်းများဖွံ့ဖြိုးတိုးတက်ရေး ဦးစီးဌာနမှ တာဝန်ယူ ဆောင်ရွက်ခဲ့ရာ တိုက်ရိုက်ကာကွယ်မှုလုပ်ငန်းအဖြစ် အလျှား (၁၀၀) ပေ၊လျောစောက်အလျှား (၆၅) ပေရှိ ကျောက်စီနံရံ (Revetment) တစ်ခုကိုခံတပ်(Up Stream)တွင် တည်ဆောက်ထားသည်။ (Revetment)၏ အပေါ်ပိုင်းအား အလျှား(၁၀၀)ပေ၊အမြင့်(၇)ပေရှိ သစ်မာသားပိုင်တိုင်အခြေပြု မြေထိန်းနံရံတည်ဆောက်ထားပြီး မြေထိန်းနံရံ ခိုင်မြဲစေရး အနောက်ဘက်တွင်(Anchor Block)များ ထည့်သွင်းတည်ဆောက်ထားသည်၊လျောစောက်ပိုင်း ကာကွယ်မှုအဖြစ်(၁ ပေ ၆ လက်မ)အထူရှိ ကျောက်သားစီနံရံအား ကျောက်စီတာရိုးများ အကွက်ချပုံစံအတွင်း ထည့်သွင်းတည်ဆောက်ထားပြီး အောက်ခြေပိုင်း ကာကွယ်မှုအဖြစ် တစ်ဆင့်နိုမ့် လျောစောက်နံရံတစ်ခုပြုလုပ်ထားသောကြောင့် မျှောတိုင် အခြေပြု ကျောက်စီတာရိုးဖြင့် ထောက်ပံ့ထားကာ ကျောက်စီတာရိုးရှေ့တွင်ရေတိုက်စားခံနိုင်ရန်
 ကျောက်ကြီးများခင်း၍ ကာကွယ်ထားသည်ကို တွေ့ရသည်။
          ထို့အတူ သွယ်ဝိုက်ကာကွယ်မှုလုပ်ငန်းအဖြစ်ဆောင်ရွက်ရာတွင် ခံတပ်ကြီးအနီးကပ်၍စီးဆင်းနေ သော ရေနက်စီးကြောင်းအားခံတပ်မှအနီးငယ်ဝေးကွာသောနေရာသို့
 ပြောင်းရွှေ့စီးဆင်းစေရန်နှင့် ရေတိမ် လာစေရန်အတွက် အလျှားစုစုပေါင်း(၂၀၀)ပေရှိ ကျောက်စီရေကာတာ (၃)ခုအား တည်ဆောက်ထားပြီး ကျောက်သား(Solid)ဖြင့် ဆောင်ရွက်ကာ အပေါ်မျက်နှာပြင်အား နှာသပ်ခြင်း၊ကွန်ကရိ(Cap) လောင်းခြင်း များဖြင့် အချိုးညီပေါင်းစပ်ဆောင်ရွက်ထားသည်ကို တွေ့ရသည်။ထိုသို့ စီမံဆောင်ရွက်ထားမှုများကြောင့် မြစ်ကမ်း လျောစောက် ရေတိုက်စားခြင်းအားကာကွယ်နိုင်ပြီး
 ကျောက်စီရေလွှဲ ရေကာ(၃)ခုမှ ကမ်းရင်းကပ်ရေကြောင်းအား လွှဲပြောင်းပေးသဖြင့် ရေနက်စီးကြောင်းမှာ ခံတပ်မှ ဖယ်ခွာစီးဆင်းလျက် ရှိသည်ကိုတွေ့ရသည်။
          အဆိုပါ မင်းလှခံတပ်ကြီးကာကွယ်ထိန်းသိမ်းဆောင်ရွက်ထားရှိမှုများအား ကြည့်ရှုစစ်ဆေးရန် တိုင်းဒေသကြီးဝန်ကြီးချုပ်ဦးဘုန်းမော်ရွှေနှင့်အတူ တိုင်းဒေသကြီးအစိုးရအဖွဲ့ဝင်ဝန်ကြီးများ၊တိုင်းဒေသကြီး အဆင့်ဌာနဆိုင်ရာတာဝန်ရှိသူများ လိုက်ပါ၍ မေ ၅ ရက် နံနက် ၈ နာရီက မင်းလှခံတပ်သို့ ရောက်ရှိခဲ့ရာ ရေအရင်းအမြစ်နှင့်မြစ်ချောင်းများဖွံ့ဖြိုးတိုးတက်ရေးဦးစီးဌာန၊တိုင်းဒေသကြီးဦးစီးမှူးဦးဇော်လွင်မှ ကာကွယ် ထိန်းသိမ်းဆောင်ရွက်ထားရှိမှုများနှင့်ပတ်သက်၍ ရှင်းလင်းတင်ပြခဲ့ပြီး တင်ပြချက်များအပေါ် တိုင်းဒေသ ကြီးဝန်ကြီးချုပ်မှလိုအပ်သည်များကို ဌာနဆိုင်ရာများနှင့်ပေါင်းစပ်ညှိနှိုင်းဆောင်ရွက်ပေးခဲ့သည်။
          ထိုသို့စီမံဆောင်ရွက်ခဲ့မှုများကြောင့် သမိုင်းဝင် မင်းလှခံတပ်အဆောက်အဦးကြီး ရှေးမူမပျက် ရှေးဟောင်းအမွေအနှစ်တစ်ခုအဖြစ် ရေရှည်တည်တံ့ခိုင်မြဲနေ
မှာ ဖြစ်ပါကြောင်း။
သန်းနိုင်ဦး(ငဖဲ)

0 comments:

Post a Comment