Wednesday, February 11, 2015

ဖေဖော်ဝါရီ ၁၁ မှာ ဘယ်လိုသမိုင်းရေးကြမလဲ


By
အမျိုးသားပညာရေးဥပဒေပြင်ဆင်ရန် တက္ကသိုလ်စိန်ရတုခန်းမတွင် လေးပွင့်ဆိုင် တွေ့ဆုံဆွေးနွေးခဲ့စဉ်က/ဓာတ်ပုံ − ဂျေမောင်မောင်(အမရပူရ)
အစိုးရနှင့် သပိတ်မှောက်ကျောင်းသားများ ထိပ်တိုက်ရင်ဆိုင်ဆုံတွေ့နိုင်မှုအပေါ် စိုးရိမ်ပူပန်ကြောင့်ကြနေသော ပြည်သူများအတွက် ဖေဖော်ဝါရီ ၁၁ ရက်တွင် ပြန်လည်ပြုလုပ်မည့် ပညာရေးလေးပွင့်ဆိုင် ဆွေးနွေးပွဲရလဒ်က အရေးကြီးနေသည်။

ရန်ကုန်မြို့တွင် ဖေဖော်ဝါရီ ၁ ရက်နှင့် နေပြည်တော်တွင် ဖေဖော်ဝါရီ ၃ ရက်က ပြုလုပ်ခဲ့သော အစိုးရ၊ လွှတ်တော်၊ ကျောင်းသားနှင့် ပညာရေးစနစ် ပြုပြင်ပြောင်းလဲရေး နိုင်ငံလုံးဆိုင်ရာကွန်ရက်(NNER)တို့၏ အမျိုးသားပညာရေးဥပဒေပြင်ဆင်ရေး လေးပွင့်ဆိုင်ဆွေးနွေးမှု အဆင်မပြေခဲ့ဘဲ ယခုအခါ ကြိုတင်တွေ့ဆုံညှိနှိုင်းမှုများ ပြုလုပ်၍ ဆွေးနွေးပွဲပြန်လည်စတင်ရန် သဘောတူလိုက်ခြင်းဖြစ်သည်။
လေးပွင့်ဆိုင်ဆွေးနွေးပွဲ ရွှေ့ဆိုင်းထားစဉ်ကာလတွင် အစိုးရက ကျောင်းသားလူငယ်များအား အသုံးချ၍ ဆူပူမှုဖြစ်စေရန် နောက်ကွယ်မှ ကြိုးကိုင်နေသူများနှင့် အားပေးအားမြှောက်ပြုနေသော နိုင်ငံရေးအဖွဲ့အစည်းအချို့ ရှိနေကြောင်း ကြေညာချက်ထုတ်ပြန်ခဲ့သည်။

လမ်းလျှောက်ဆန္ဒပြမှုများကို ဦးဆောင်နေသော ဒီမိုကရေစီပညာရေးလှုပ်ရှားမှု ဦးဆောင်ကော်မတီကလည်း ကျောင်းသားသပိတ်စစ်ကြောင်းများသည် ပညာရေးတိုက်ပွဲဆင်နွဲနေခြင်းဖြစ်ပြီး အစိုးရ၏ ကိုင်တွယ်ဖြေရှင်းမှုသည် တိုင်းပြည်၏ အနာဂတ်ဖြစ်လာမည်ဖြစ်ကြောင်း ပြောကြားခဲ့သည်။

‘‘ကျွန်တော်တို့ ပညာရေးခေါင်းစဉ်အောက်က သွားတဲ့အတွက်ကြောင့် တခြားမည်သည့်လှုပ်ရှားမှုပုံစံကိုမှ လုံးဝသွားမှာမဟုတ်ပါဘူး။ ကျွန်တော်တို့ ဒီမိုကရေစီလှုပ်ရှားမှု ဦးဆောင်ကော်မတီ ၁၅ ဦးကို ကျောင်းသားထုကပေးထားတဲ့ ပုံဏ္ဌာန်သည် ပညာရေးတိုက်ပွဲကို ဖော်ဆောင်ဖို့ဖြစ်တယ်။ အဲ့ဒီအတွက် တစ်နိုင်ငံလုံးက လူထုတွေ ၀န်းရံပါ လက်ခံပါတယ်၊ အလုပ်သမားတွေ ၀န်းရံပါ ကျွန်တော်တို့ လက်ခံပါတယ်။ သို့ပေမဲ့ ပညာရေးတိုက်ပွဲက ရှောင်ဖယ်လာရင်တော့ ကျွန်တော်တို့အားလုံး ပြန်တိုက်ပွဲဝင်မယ့်ကိစ္စပါ’’ဟု သပိတ်မှောက်ကျောင်းသားခေါင်းဆောင်တစ်ဦးဖြစ်သူ ကိုဇေယျာလွင်ကပြောသည်။

ကနဦးလေးပွင့်ဆိုင်ဆွေးနွေးပွဲများတွင် သဘောထားကွဲလွဲမှုများ၊ အဆင်မပြေမှုများ ဖြစ်ပေါ်ခဲ့သလို ဆွေးနွေးပွဲရွှေ့ဆိုင်းထားစဉ် အပြန်အလှန် ပြစ်တင်ပြောဆိုထားမှုများအပေါ် ယခုဆွေးနွေးပွဲ ၌ ချေဖျက်နိုင်ရေး ကြိုးပမ်းရမည် ဖြစ်သည်။

ရန်ကုန်တိုင်းဒေသကြီးလွှတ်တော်၌ တတိယအကြိမ်တွေ့ဆုံမည့် လေးပွင့်ဆိုင်ဆွေးနွေးပွဲတွင် ကျောင်းသားများ တောင်းဆိုထားသော အချက်(၁၁)ချက်ကို အပြန်အလှန်နားလည်မှု၊ ယုံကြည်မှုတို့ဖြင့် ဆွေးနွေးနိုင်ရန် လိုအပ်နေသည်။
‘‘ဒေါ်အောင်ဆန်းစုကြည်ပြောတဲ့ စကားတစ်ခွန်းရှိတယ်။ စေ့စပ်ညှိနှိုင်းရေးဆိုတာ နှစ်ဖက်စလုံးက လျှော့မှဖြစ်မှာ။ ကိုယ့်တောင်းဆိုချက်ကို ၁၀၀ ရာခိုင်နှုန်းရမှ သဘောတူမယ်ဆိုရင် ဒါဒီမိုကရေစီမဟုတ်ဘူး။ အဖြေလည်းရမှာ မဟုတ်ဘူး။ အဲဒီစကားအရ နှစ်ဖက်ညှိနှိုင်းပြီး အပြန်အလှန်သွားစေချင်တယ်’’ဟု နိုင်ငံရေးလေ့လာသူ စာရေးဆရာကျော်ဝင်းက 7Day New အား ပြောကြားထားသည်။

သပိတ်မှောက်ကျောင်းသားများ တောင်းဆိုချက် (၁၁) ချက်နှင့်ပတ်သက်၍ အစိုးရက လေးပွင့်ဆိုင်ဆွေးနွေးမှုမှရရှိသော သဘောတူညီချက်များအား ပညာရေးဝန်ကြီးဌာနမှ လွှတ်တော်သို့ ပြန်လည်တင်ပြမည့် အမျိုးသားပညာရေးဥပဒေကို ပြင်ဆင်သည့် ဥပဒေကြမ်းတွင် ထည့်သွင်းပေးသွားမည်ဟု ကြေညာထားသည်။

ဒီမိုကရေစီပညာရေးလှုပ်ရှားမှု ဦးဆောင်ကော်မတီမှ သပိတ်မှောက်ကျောင်းသားခေါင်းဆောင်များက NNER မှ ပညာရှင်များနှင့် ၄င်းတို့အနေဖြင့် ဥပဒေကြမ်းပြင်ဆင်ချိန်တွင် အတူပါဝင်ဆောင်ရွက်ခွင့်ရရှိရန် တောင်းဆိုထားသည်။

ယင်းအချက်နှင့်ပတ်သက်၍ ရန်ကုန်တက္ကသိုလ်၊ စိန်ရတုခန်းမတွင် ပြုလုပ်သော လေးပွင့်ဆိုင်ဆွေးနွေးပွဲ၌ သဘောထားကွဲလွဲမှုများဖြစ်ပေါ်ခဲ့သလို ထပ်မံပြုလုပ်မည့် ဆွေးနွေးပွဲတွင် ယင်းအချက်အပေါ် အပြန်အလှန်ညှိနှိုင်းရဖွယ်ရှိနေသည်။

လက်ရှိအချိန်တွင် ဇန်န၀ါရီ ၂၀ ရက်က မန္တလေးမြို့မှ စတင်ချီတက်ခဲ့သော ကျောင်းသားသပိတ်ပင်မစစ်ကြောင်းသည် ဖေဖော်ဝါရီ ၉ ရက်တွင် ပြည်မြို့သို့ရောက်ရှိပြီး ဆက်လက်ချီတက်လာနေသလို ပုသိမ်မြို့မှ ထွက်ခွာလာသော ဧရာဝတီစစ်ကြောင်းသည်လည်း ကျိုက်လတ်မြို့ကို ကျော်လွန်လာပြီဖြစ်သည်။

ထို့ပြင် ပခုက္ကူကျောင်းသားစစ်ကြောင်းသည် အောင်လံမြို့ကို ကျော်လွန်လာပြီဖြစ်ကာ ထားဝယ်၊ မော်လမြိုင်စစ်ကြောင်းသည် မော်လမြိုင်မြို့တွင် စီတန်းလှည့်လည်သပိတ်မှောက်မှုများ ဆောင်ရွက်ထားကြပြီဖြစ်သည်။

ကျောင်းသားသပိတ်ချီတက်နေမှုနှင့်ပတ်သက်၍ နိုင်ငံရေးလေ့လာသူများက လေးပွင့်ဆိုင်ဆွေးနွေးပွဲဖြင့် အဆင်ပြေသွားခြင်း၊ အစိုးရက အကြမ်းဖက်ဖြိုခွင်းခြင်းနှင့် အခြေအနေအားလုံးရှုပ်ထွေးလာပြီး တပ်မတော်က  အာဏာပြန်သိမ်းခြင်းအထိပင် ဖြစ်လာနိုင်ကြောင်း သုံးသပ်ကြသည်။
သပိတ်မှောက်ကျောင်းသားစစ်ကြောင်းများ ချီတက်ရာ လမ်းတစ်လျှောက်တွင် အားပေးထောက်ခံမှုများဖြင့် အရှိန်မြင့်တက်လာနေသလို အခြေခံနှင့် အဆင့်မြင့်ပညာစာမေးပွဲများ နီးကပ်လာခြင်းကြောင့် လေးပွင့်ဆိုင်ဆွေးနွေးပွဲရလဒ် အဆင်ပြေစွာဖြင့် အလျင်အမြန်ထွက်ပေါ်လာရန် လိုအပ်နေသည်။ ဖေဖော်ဝါရီ ၉ ရက်က ပြုလုပ်ခဲ့သော ဒုတိယအကြိမ် ပညာရေးလေးပွင့်ဆိုင်ဆွေးနွေးပွဲအပြီး သဘောတူညီချက်ကိုးချက်ဖြင့် ဖေဖော်ဝါရီ ၁၁ ရက်တွင် ဆွေးနွေးရန် သဘောတူခဲ့ပြီးနောက် ကျောင်းသားများ မူလက သဘောတူထားသည့်အတိုင်း ဆွေးနွေးစဉ် သပိတ်မှောက်မှုရပ်ဆိုင်းရန် အစိုးရကကြေညာသည်။

၂၀၁၄ စက်တင်ဘာ ၃၀ ရက်က သမ္မတလက်မှတ်ရေးထိုး အတည်ပြုလိုက်သော မြန်မာနိုင်ငံ၏ ပထမဆုံး အမျိုးသားပညာရေးဥပဒေတွင် ဗဟိုချုပ်ကိုင်မှုများ လျှော့ချခြင်း၊ ကျောင်းသားသမဂ္ဂများ တည်ထောင်ဖွဲ့စည်းခွင့်ပြုခြင်းတို့ ထည့်သွင်းပြဋ္ဌာန်းနိုင်ရေး လေးပွင့်ဆိုင်ဆွေးနွေးပွဲက စွမ်းဆောင်နိုင်မည်လား စောင့်ကြည့်ရမည်ဖြစ်သည်။

သပိတ်မှောက်ကျောင်းသားများ တောင်းဆိုသော အချက်(၁၁)ချက်
၁။ ပညာရေးမူဝါဒနှင့် ဥပဒေများ၊ နည်းဥပဒေများ၊ ဆက်စပ်ဥပဒေများ ရေးဆွဲရာတွင် ကျောင်းသား၊ ကျောင်းသူကိုယ်စားလှယ်များ၊ ဆရာ၊ ဆရာမကိုယ်စားလှယ်များ ပါဝင်ရန်

၂။ ကျောင်းသားသမဂ္ဂများ၊ ဆရာသမဂ္ဂများ လွတ်လပ်စွာ ဖွဲ့စည်းထူထောင်လှုပ်ရှားခွင့်နှင့် ယင်းသမဂ္ဂများတည်ရှိမှုအပေါ် တရားဝင်အသိအမှတ်ပြုရန်

၃။ လက်ရှိပြဋ္ဌာန်းပြီးဖြစ်သော အမျိုးသားပညာရေးဥပဒေတွင် ပါဝင်သည့် အမျိုးသားပညာရေးကော်မရှင်နှင့် တက္ကသိုလ်များ ပေါင်းစပ်ညှိနှိုင်းရေးကော်မတီ ဖွဲ့စည်းထားခြင်း

၎။ ဒေသအလိုက်နှင့် ကျောင်းအလိုက် လွတ်လပ်စွာစီမံခန့်ခွဲနိုင်သည့် ပညာရေးဆိုင်ရာ ကိုယ်ပိုင်ပြဋ္ဌာန်းခွင့်
၅။ လက်ရှိကျင့်သုံးနေသော စာမေးပွဲစနစ်နှင့် တက္ကသိုလ်ဝင်ခွင့်များ ပြင်ဆင်ရန်

၆။ ကျောင်းသားများ လွတ်လပ်စွာ စဉ်းစားတွေးခေါ်နိုင်ပြီး ကိုယ်တိုင်လေ့လာစူးစမ်းသင်ယူနိုင်သည့် သင်ကြားနည်းစနစ်များ ပြောင်းလဲရန်

၇။ တိုင်းရင်းသားမျိုးနွယ်စုများ၏ ဘာသာစကားလွတ်လပ်ခွင့်နှင့် မိခင်ဘာသာစကားအခြေပြု ဘာသာစကားစုံပညာရေးစနစ် (mother tongue based multilingual education)ကို အမျိုးသားပညာရေးဥပဒေတွင် ထည့်သွင်းပြဋ္ဌာန်းရန်

၈။ မသန်စွမ်းကလေးများအပါအဝင် ကလေးအားလုံးအတွက် လူတိုင်းအကျုံးဝင်ပညာရေး (inclusive education) စနစ်ဖြစ်အောင် ဆောင်ရွက်ပေးရန်

၉။ ကျောင်းသားအရေးအခင်းများကြောင့် ကျောင်းထုတ်ခံခဲ့ရသည့် ကျောင်းသားများ ကျောင်းပြန်လည်
တက်ရောက်ခွင့်ပြုရန်

၁၀။ ပညာရေးအသုံးစရိတ်ကို တစ်နိုင်ငံလုံးအသုံးစရိတ်၏ ၂၀ ရာခိုင်နှုန်း သတ်မှတ်ရန်

၁၁။ အခမဲ့မသင်မနေရပညာရေးစနစ်ကို မူလတန်းအဆင့်သာမက အလယ်တန်းအဆင့်အထိ တိုးမြှင့်ကျင့်သုံးရန်တို့ဖြစ်သည်။


http://7daydaily.com/story/31492#.VNsdqn-oBU4  မှ ကူးယူဖော်ပြပါသည်။

0 comments:

Post a Comment